Brâf Furlan

"Adess me racumandi, laurà": di ca indenant a si cjacararà lombart ancje in Friûl, tant a lu si sa, al è Bossi cui che al comande. RadioPadania e invide a lâ a vore, par paiâ mancul tassis, cui no i sta, e vê sigurece che, par lôr, e vûl dî cjapassile cui imigrâts, lu si sa, ducj delincuents.

Il tierç partît de Italie, la Leghe, trê voltis chel di prin, al smicje di meti fen sot dal toblât. No son alì migo dibant!  A laran ae casse, a àn vinçût lôr, netisie, vie i sflacjons. Vie des balis chei furlaniscj che no si sa cun cui che stan: a van mo ca, mo là, daur di ce che ur comude.
Il podê de Leghe, cumò che al è ancje partît di lavoradôrs, e no nome dal popul de partide IVA (e de evasion) al è di sburtâ pai lôr interès, nol sarà plui il partût de scocole voi Guerra e dal conciliadôr Violino, cumò muse dure e barete fracade...

“O feveli furlan - al dîs Tondo - e lu cjacari cui mei colaboradôrs. No crôt che il probleme al sedi inventâ une burocrazie furlane - al zonte par talian - par vê dut voltât par furlan, ma doprâ la maniere furlane par vê mancul int in file e une aministrazion che e funzioni.” Cussì l'ustîr Taront al cjacare siervint tais te sô buteghe. Pocjiis ideis e biel lant daur ai plui coiars, chei che a fasin la opinion in dì di vuê.

Metint denant i interès di cualchidun a chei di ducj, la burocrazie a la identitât.

Ce dî di chei altris, di chei che a àn pierdût. Si po jessi brâfs tal comunicâ ma alc a àn sbaliât tal viodi la situazion. La bisugne di sigurece e bêçs, il lâ mancul de solidarietât e dal ben volê al prossim, e il nâs, sigûr il bon nâs,   a àn puartât a lâ tal braç di cui che al olsave a dî che chês de identitât, de solidarietât, dal ben vivi insieme, dal fâ puest a cui che nol rive, dut chest al è nuie.
Grande responsabilitât le àn vude i politics che no àn capît che la int e je strache, stufe e che no vûl tancj discors, ma usade come che a je, a la publicitât, e vûl rispuestutis facilis e sempliçutis.
O crôt che ducj, vincents e trombâts, a scugnin pensâ ben e àn di fâsi cualchi domandute. Dal tipo, la int ce fastidiis ae? Tropis rispuestis podìno dâ? Ur dino sflocjis o soluzions?

A me fie o ai dit. - Tu âs la fortune di no vê di spietâ cuissà trop, come che o ai fat jo, par viodi vinci cui che tu âs votât!

Pensavi, me pari nol è mai lât a cjacarâ cui mei professôrs. Jo lu fâs di simpri. Vuê mi è tocjât lâ a sintilis par mê fie piçule. Nol è che no si lis meretave, al è che mi secje sintilis. Soi un pôc stuf di savê che no studie avonde, che bisugnarès che stes plui atente, che podarès fâ miôr e vie indenant.

Fat sta che i insegnants ju sint frustrâts. Varan ancje reson. A àn un stipendi che nol è cuissà ce trop, son, la plui part, feminis, cussì i oms a puartin a cjase il pagnut e lôr no si danin cuntun mistîr. A part chei chi che a son lûcs comuns, (sarà invidie?), a àn un lavôr biel, cui fruts, che al varès di jessi biel, e cu la libertât di insegnâ che e je grande.

Vuê o 'ndi ai cognossudis trê. Une mi à cjacarât plui dai soi fîs che no dai mei. Un'altre mi è sameade esauride ma apassionade. La tierce, la plui grintose, mi à ditis un grum e une sporte. Dutis dacuardi che la me sbilfe e je simpatiche. Lu sai, lu sai, mi fâs ridi ancje a mi. Se no studie avonde ce si aial di fâ?

Daspomisdì, o olsi a dilu, ancje se no si par bon, di mierde.

A cualchidun o scugni ben dilu. O ai passât oris a capî ce che al steve sucedint cence dâmi une rispueste, cence cjatâle. Soi scjampât dal lavôr clamât colât intun davoi plui grant di ce che si crodi.

Pitost che sintî il mâl si preferìs cirîlu. Par no pensâ ai fastidis, stiçâju. Par stâ miôr a chel livel di sopuartazion alçâlu ancjemò. Cence podê cjatâ padin, parcè che plui in su di chel livel al è nome un mâl plui grant. E no fermâsi ancjemò, cence fin, cence une jessude, cence cjâf ni resons.

Sintîsi cussì bessôi che lis robis reâi a deventin pesantis che ti sclicin, cjalcjin masse, tabiin ancje a no volê.
Se son robis che  fasin preocupâ, a lu son za cence alçâ il tîr. Se si voleve dimostrâ alc, lu si è za fat avonde e ancje plui di ce che al covente. Il spac cjapât al è tant che mieç al è vonde, se si podès vê la bachete magjiche e, zachete, voltâ il pes dal mâl e fâlu svolâ lu fasarès.

Jo no sai cemût spiegâ che il ben vivi nol è facil a di nissun, che ognidun nol è contenton di se, dal propri cuarp, di ce che si è rivâts a jessi, che simpri si podarès lâ al miôr, ma ce che al è al è e si po contentâsi.
Il jessi stracs nol zove a tignî sot la fadie e i bruts pinsîrs.

Se il troi da pît de cleve al spaurìs si po cjapâlu di traviers, cjapâlu cuntun pas plui lent, sintâsi ancje a ogni volt. E augurâsi che al sedi il plui curt pussibil.

Tra folcs che àn trat al ordenadôr e telecom che no da la linee o ai une baruffe continue. O sai che tal blog varessin di jessi notazions no propite cussì ordenariis, ma orco boie, se si paie par vê un servizi e la linee se je e côr come un mus e di gracie che e sedi, beh alore lu scrîf.

E lis mês a son bagulinis in confront a ce che i è sucedêt a chê miss di Strassolt!
A je no son fin  rivâts sms che vevin di butâle su in alt tal concors. Pensait ce robis. Bêçs strassâts. Dut par colpe de telecom. Une juste a 'ndi à fate alore, in fin dai conts, cheste benedete telecom!

Le ai sintude a telefriuli. I àn domandât se i displaseve mostrâ il cul par vinci. E à vût il coragjo di rispuindi che je che è sportive lu à dûr e che a son ches secjis sclagnis di anoressichis che lu àn flap e che àn protestât. Par jê e leve ben che i calcolassin il penç dal cûl, scusait la bassece.

Ma va là a dâlu vie, par plasê. Cjare la mê biele Valentine, tu sês ben stupidute e no tu sâs ce che tu disis, e ce solidarietât cun chês maladis di tôs colegas, e ce superioritât, ce finecis!

Chei oms che àn fat i cuarante, jo di un pieç,  a scugnin stâ atents. E je dute une cuestion di sfumadure e detais minûts

Jeans
Se tu ju âs simpri doprâts alore tu puedis lâ indenant. Se tu  dopris simpri chei di une vite, nie di mâl. Ma se tu lu âs intor par vistiti di zovin  il vinars daspomisdì, nol è par te. Al è come dî:nome cumò o soi tai mei vistîts. Ma se dopo no son i toi si lu viôt benissim.
Tecnologje.
Chei che van su My space cence cjavei e cu la panzute, om di panze om di sostance, fasin dûl e magari a plasin par chel. A son chei parsore dai cuarante a vê inventât telefonin e ordenadôr. A àn cjatât la maniere di jessi simpri tacâts a la rêt, ma no je za plui robe lôr.
Balâ
Oms e bal no van dacuardi. I oms no àn mai balât cun gust. Tal timp di un lent a la “samba pa ti” o rivavin a tabiâ i pîts a la compagne plui di une volte. Parcè tacâ cumò? Se e je une robe che e tache cu la etât, scancelâ subite.
Ideis
Ni masse ideis ni masse pocjis. Fers su lis posizions di simpri, cence jessi masse dûrs. Sono robis brutis tal mont? Se a son, se no lu disin nô, cui? A son dut orelis a scoltâ.
Musiche
Chei come me a pensin che i zovins no san ce che e je stade la buine musiche. Ma fâ a gare cu la liste dai tocs cuntun di vincj agns no mi viôt. Cuntun di trente che al gjolt cui Duran Duran no je nancje gare.
Machinis
Machine, vile e piscine. Al è di sigûr un film. No il gno. Ce che o ai intor al è gno e al è ce che o vuei. I siorats a son di une altre bande o a son di une altre ete.
Amantis
Cu la etât di mê fie. Se tu vâs intun puest e ti cognossin ce disistu che je tô fie o ce? Se no je tô fie isal amôr? Bah.
Bêçs
Se no tu 'ndi âs tancj al sarà dificil che nus rivin di cumò indenant.Cui che a 'ndi à masse nol à voi par dâmi i fruçons a mi. E je vignude la ore di molâ di cirîu.
Podê
No stait a dî che o sês fruiâts dal podê. O al è pene tacât o nol rivarà plui.

A jessi gjenitôrs in dì di vuê a no si sa di ce bande tacâ. E je ancje vere che ogni timp al à la sô pene e ancje che la fuarce e ven daûr de prove che tu âs di frontâ.

Cui che a mi fasin dûl a son i zovins di cumò. No nome i  furlans, nancje forsit i talians. A son ducj compagns. Come che al diseve Carosone a vuelin fâ i 'merecans.

O sin une potence economiche e militâr. O si sintin cui siôrs de tiere te taule dal G8. I nestris esercits a stan a paronâ cui 'merecans ator pal mont.

E i nestris zovins a son pierdûts intune tace di aghe. Il lôr timp al è cuant che a si sintin fuarts, pene che cale il soreli tal lôr cjâf e cale la gnot e il scûr su pinsîrs e futûr.

La veretât, mi pâr, e je che no san ce che son, a àn une gruesse confusion intal lôr cjâf.

  A son debii e crevadiçs e forsit e je nestre la colpe di no vêur insegnât a contentâsi dal lôr mont.

Une sorte di sospension racuelte come tal galop dai cjavai. Ogni bestie a cuatri çatis e à un moment là che dutis e cuatri lis gjambis a son par aiar. Fermâ chel atim, impussibil, al da la idee de potence che à di vignî. Un uman, cun doi pîts, nol à mai chê sensazion, e i ven di ridi, i ven di cjalâ l’at in se come se nol fos par lui il jessi daûr a svolâ lizêr. O sin simpri par tiere, il nestri svol a ogni pas nus mancje, par chel cun dute la nestre inteligjence o sin in font cjalcjâts, grevis, pesants.

Cussì a stan i nestris zovins e a capîju nol è sempliç. La mê gnece Gjulie e ven spes a cjatâmi, forsit par tirâ flât e stâ plui a slas che no a cjase sô. Ven chi e si sint parone e jo o soi contente che par me al è un gjoldi vêle. E à vût un an dulà che  no è rivade a cumbinâ nuie. Po ben, al capite. E miôr une musse vive che une professoresse muarte. Un àn dulà che e à balinât, e à ancje di vê studiât, ma no jere cul cjâf, lu veve cuissà dulà. E l’an al è lât. Cumò e varès bisugne di tornâ a cjatâsi. O sai che lis sôs amiis la cirin, ma je o no si fâs cjatâ o rispuint che si, ansi no, che no à timp. Insome no sa nancje jê cemût gjavâsi fûr de busate la che e je colade.

Ogni tant e cjacare di volê lâ vie, ma dulà, e a fâ ce. Se o ves vincj agns di mancul o cjaparès su e o larès vie cun jê, ma a la mê etât o mi fâs ridi se o cjapi su e voi daûr di une frute cence savê ni ce e ni co.

Lis seradis dai zovins udinês a scomencin cui spritz. L’aperitîf al è un rît e, par rindisi cont di chest, al è vonde lâ a fâ un zîr intes viis dal centri. Dalis siet di sere, i ambients di Udin a son cjapâts d’assalt di trops di zovins.
Place Libertât, di Larc dai Pecile, Place Sant Jacum... a son plens di int cul tai in man.

E daspò se nol è vonde si tire tart e salacor si cîr il sbal.

No mi fâs câs dut chest. Ma mi vegnin uns dôs cuestions: àno bêçs i zovins, trops a 'ndi àno?
No àno altris fastidiis? Ce àno pal cjâf, di ce discorino che cul blanc in man a àn tant ce discori? Provâ a svicinâsi e sintî lis monadis che disin al è dut un.
Samee che i zovins a sedin vecjos se no te ambizion di vê une cariere.

No ai nostalgjie dal militant, a mi mancje l’afiet e la compassion, par dîle cun concets forescj al Friûl di vuê.

Vedût un cine al Far East Film Festival (FEFF). Usgnot al jere One summer with you, une Istât cun te. Biel, no bielonon, 100 minuts che a podaressin jessi 20 o 30 di mancul, ma no impuarte.
Impuarte che il teatron al fâs la so biele figure, vistût in gringule, colorât e plen di int zovine.
Tante int di fûr, foreste che no sarès vignude a Udin che no par chest motîf. Biel viodi la citât che si anime e che e à alc ce dì come che dal Friûl al rivàs un svant a dut il mont.

Funzione cussì: tu jentris al è un cine cinês o corean con i sot titui par inglês e se no tu capissis ti dan une scufe che ti volte par italian. Ma de vôs o soi sigûr che la signoriine e jere furlane. E cirive di voltâ benon ancje se nol jere cuissà ce dificil.

A chei dal Cec o volarès digj che si podarès ancje provâ a voltâ par furlan dal inglês e soi sigûr che cualchi volontari par scandai al podarès fâlu vulintîr dibant.

A ce pensino i zovins che sflacjôs a remenin i lôr zainuts vie pe primevere dai viâi no di scuele?

A jessi biei, al lôr cuarp, a la lôr vite materiâl, a jessi vistîts te maniere juste dal branc, tant che e plasedi a di chei altris e a no dâ mai assoludementri la impression o il câs che si viodi che a no stan plui che ben.

A vuelin jessi compagns, si sintin lôr fuarts, bessôi e origjinai, unics nome cuant che son compagns a ducj chei altris.