Brâf Furlan

E jere une sere che o vevi di lâ a sintî sunâ mê fie cu la sô bande a Madrîs di Feagne. Te osterie "La brente" (lait, ospitalitât cjalde e presut di lusso) o lampi il gjornâl o lei dai FLK a palaç Pico a Feagne. Orco mondo, o mi dîs, ce fasio achì dongje, o voi. O cjapi su e cuatri e cuatri vot o soi là. Orco di bacco si paie, vot euros, po ben anin.

A tachin freduts, a sintin chei cuarante di ca e la sale stente a scjaldâsi. Formazion eletroacustiche cence batarie e tastieris e cu la percussion che e fâs ce che e po. La Cristina e fâs dut il so e je la zovine Deborah Cutugno, ce orele, compliments, cu la seconde vôs, a tignile su fin che la parone no cjape su la serade. Daniele Flaiban a la chitare acustiche amplificade e mandulin al dà chel sburt vivarôs e zovevul. Chescj doi zovins a dan un di pluidi frescje vitalitât al grup che, bisugne dîlu al è tegnût su dal bas melodic, liric e batecul di Flavio.

Jo o larès a sintîju ancje a cja dal diaul. Ma o volarès fâ une domande. Rivât, come che o soi, a cincuante concierts, isal un bonus, un santut, un autografi de mitiche Mauro?

I ultins tocs a funzionin miôr, chei vecjos Em-ma, ma ancje l'ultin bis la "Travariza" di "une file, une e daspe..." funzione, orpo se funzione.
No sai se e je la musiche o cemût che le cjante ma "Stabat pater" e ven fûr plui che benon e al è un gran toc. "Se il nero" al è plui facil, al cjape subit. Ma jo di vecjo fan o ven scjaldât fin te panze, e o mi pas, cuant che o sint a tacâ "Vegle di lune"...

Serade speciâl al me paisut, in glesie parcè che no 'ndi è altri di spazis publics. Biele rapresentazion, un musical in furlan, religjôs ma no dome, disarès moderni, cun cuartet plui organ e percussions. Côr e soliscj. O ai presentât ju cul cûr fin tal cuel, ma no jere angjine, nome emozion pe mê prime volte di gnûf su la onde, po si son distudadis lis lûs e mi è scjampade une lagrimute, di emozion, par veile fate a puartâle fûr.
 Musical dal titul "Cui ciriso?" di Silvano Buchini e il so "Emmaus ensamble". Biel e di viodi.

Viodût a Palme al auditorium S.Marco, ex-filande palmarine, îr di sere “Re di spade” di e cun Carlo Tolazzi.

Si conte la storie medievâl di Fiore dai Libars (ca. 1350 - ca. 1420), cognossût ancje come mestri di scherme e de art di mateâ culis armis di ponte e di tai.

Il Flos Duellatorum dal 1409 e je la sô opare de maturitât:

"Io, Fiore Furlan dai libars, di Cividât, Diocesi di Aquilee, fi di mestri Benedet, a ducj che che vuelin dedeâsi al zuc des armis, a pît o a cjaval, i doi il gno salût intal non di Diu e cui auguriis di une buine realizazion di ce che miôr desiderin” cussì si vierç il sô libri su la art dal scombati tai duei.

(viôt pal test)  Fiore al è cognossût in dut il mont, pôc in Friûl. Ca di nô tegnin alte la sô art la de Academie de’ Malipiero

Jo o cognòs la strade dongje dal templi Ossari a Udin e o pensavi, di frut, che fos robe di partigjans.

Il spetacul conte cheste storie cuntun monolic dal Tolazzi che si doplee in doi personaçs, un dal dì di vuê che al comente dut ce che al sucêt, e il Fiore dentri a la sô storie.

Saltin fûr un grum di cjantis compagnadis a la ghitare. Si cjatin messedâts Simon e Garfunkel cun Bob Dylan, John Lennon cun Venditti, Battiato e Finardi. Opare meritorie e bon test.

Ma Tolazzi nol convinç, al lei masse il test, nol cjacare recitant al public, lu fâs masse svelt, lis pausis a son nome par meti e gjavâ la ghitare, cuntune premure di rivâ insom come che lu muardès la tarantole. Dacuardi pocje int, ma se o pai par vioditi che tu sedis a Palme o al Mittelfest tu âs di dâmi chê orute e un cuart di spetacul. Tirâ il timp a une ore scjarse e je pôre, tignî la sene bessôl nol è par ducj, îr di sere nol jere par lui.

Sintût il conciert di Gaëlle Solal al Conservatori di Udin. La zovine ghitariste francese (Marsiglia ’78) e insegne a Sevilla e zire il mont. A Udin par trê dîs di insegnament e un conciert cuntune cincuantine di fortunâts. Tant biele che brave.

Dut inutil contâ di cemût che e ten la manute e di ce musicalitât che je buine. Scoltaile se o vês voie, in trê tocs che e à eseguît ancje îr, o ca o  ca o ancjemò ca. Provait che a 'ndi vâl la pene.

Invecit o vuei contâus de val Saisere, tarvisian, la val che e tache di Valbrune. Vuê e jere une biele zornade di soreli e pocje int e à vude chê pensade di viodi la nêf. In planure chest an no si è podude viodile. Alore meretave chê orute di viaç e lassâsi incjantâ di une zornade. A un ciert pont al è passât un cuntune sdrume di 7 cjans a tirâ la slite, mi soi russât i voi, ma lui e i soi cjans a jerin là denant di me, tal blanc e lui i comandave di ce bande voltâ e lôr, biadei, a ubidî.

Mi à passût chê viste plui de sodisfazion di vê rivât a menâ ator la panze sui ski, che in rive su e je faturone, mancul mâl che in rive ju o côr che al è un plasê!

Viodût un spetaculin a Cerneglons cun la Cristina Mauro e Stiefin Montel. Cuatri gjats a sintî, lôr professionai fasin il lôr lavôr ancje cuntun public difarent dal solit. Une dimension teatrâl, dongje dal public e cence palc, cuntune pedane, atmosfere intime e familiâr. Note positive e je chê di podê sintî un discôrs su la musiche furlane intune maniere lizere e coinvolgente.

Il titul: Musiche e peraulis dal rinassiment al dì di vuê.
Di Rinassiment al jere un fruçon, chê Scjaraçule maraçule di Giorgio Mainerio dal so libri dai bai dal 1578, un tic di Ermes musicât di Lino Straulino (cjantât benissim di Cristina, giavant fûr sunôrs che te esecuzion di Lino a mancjin) e dopo un salt fin a Dario Zampa di trê secui.

Lis vilotis son stadis presentadis nome intune elaborazion za sintude de "Sedon salvadie" cuntune presentazion strambe di Stiefin Montel. Al è stât cjapât dentri Pauli Pasolin: intun judizi dal Friûl dal model dal Zorut al diseve ogni mâl.  La vilote, in chel disegn dai agns cuarante e di chel mont bucolic, e jere plene di marum e Pasolin i viodeve nome malincunie. Chel so judizi, come tancj dai soi judiziis, a son apoditics. Ma su la vilote a 'ndi a ditis ancje altris. Il Montel, cjapant nome une rie, al dîs che la vilote e je invecit legre, no mumiote, come sbaliant, al dîs Pasolin.

No sai se o ai rivât a spiegâmi. Il judizi musicologjic che al stâ daûr a cheste leture al è masse svelt, la leture di Pasolin a bighe di cop, e la tratazion de vilote lizerute.

Il conciert lezion al lasse puest al repertori dai FLK e lì al cjape il svual  insiorantsi de vôs de Cristina no simpri e ben sopuartade de ghitare.
Di tornâ a sintî un discôrs preparât  miôr su lis vilotis che meretin jessi tratadis cuntun altri spessôr. Giovanna Marini docet.

Viodût a Orsarie di Premariâs "Un canto di Natale" gjavât fûr di Dickens, chê storie famose parcè che il trist Scrooge dopo al devente bon. Il teatri di 150 puescj al è une bomboniere, di chei cui implants e la sufite di len a viste.
Al leieve Omero Antonutti, furlan di Blessan, musiche origjinâl di Davide Pittis.
Biele e tante. Al è un lavôr musicâl cussì grant che pecjât se nol fos vedût ator.
Omero in grande forme, disponibil a fâ une robute di paîs.
Il dut insiorât di chel smafar di Luca Zampar (di chei bulos di Arearea) che al à balât in 4 metros 4 il gambiâ di Scrooge, po plasê o no chê danze moderne, ma al jere pardabon biel di viodi. Il test al jere comedât di Picchio Visintin, no sai parcè che no lu à fat par furlan. Musiche dal vîf, musiche di viodi, spetacul di gjoldi.
No si sa se, daur di ce ch'al insegne il spetacul, o sarin al fin plui bogns ancje nô.

- An gnûf, clamimi pari! – Ce pari, tu sês vecjo e vonde, santul bausart, vêr tant che un zurament fals?
– No tu mi perdonis. – Tu no tu sês mertevul, tu âs fat masse mâl.
– Parcè, no soi fi di Diu? – Tu sês un grant fi di sdrondine.
– O vuei stâ in cheste cove distess. – Il to timp al è finît.

– O ai la buine fé. – Tu no tu ndi âs mai vude.
– Tant mancul tu. – Se o soi pene nassût.
– In ce aio falât? – Lu sa cui che ti à vivût.
– Dimilu, fi. – Va là, e che ti vegni un cancar!

An vecjo sêstu ancjemò alì? An vecjo ce fâstu, no vâstu vie?

Si sa di no, ce aio di fâ, di stâ ca a cucâ?

Va là, macaron, cjape la tô strade e gjaviti dai marons.

Parcè dîstu cussì, no sino amîs?

Ce amîs e amions, jo no ti cognòs!

No ma no podaressio stâ cidin, dongje di te?

Nancje par insium, jo o soi il paron!

Fin mieze gnot soi il princip de gnot.

Princip o peçotâr a mieze gnot tu sês nissun!

Se o soi il siôr, vûstu insegnâmi tu?

Tu jeris, tu jeris, jo o soi picinin ma ben comandin!

Se i toi parincj mi cjatin, ce mi puedino fâ?

Un cûl come un verzotin, che piês di te a no 'ndi è.

A mi no mi tocjarà nissun, o soi an di rispiet!

An di mierde, an di cûl, vie di ca cence fâ dûl!

O pues paiâ, zontant ai bêçs  o pues preâ!

Clame il bancjîr, clame il plevan e mene vie il deretan!

Viodude a Grao la brave Rossana Casale te Basiliche romaniche di Sante Eufemie “Merry Christmas in Jazz”.

Plene di int che si spietave "Jingle bells" o "Astro del Ciel". Nancje un puest libar as vot e un cuart. Cun pazienze cu la femine si postin in ultime file in pits. Al secont toc a àn tacât a lâ fûr. Cui che nol si spiete il jazz al fâs fadie a glotilu. E al pâr strani intune glesie scoltâ bass batarie piano sax e vôs. Dut câs al jere propite un biel conciert di Nadâl.
Mi displâs pai graolês e pes lôr aspetativis: sioris impeliciadis che levin fûr cun muse sgnaolote, oms mumiots che vuadagnavin il puarton come che nasassin puce di frait. A chel pont puest di metisi in sinton a 'ndi jere, ma la mê orele si jere usade e no mi soi mot.
Mi le soi gjoldude da pit insomp. Brave, siore dal jazz, plene di strieç.

Viodût spetacul di lusso: "A fuarce di jessi svint". Al Menotti di S. Svualt un côr, chel di Cjasteons zontât cun chel di Gonars,  cuintet di arcs "Pezzè", fisarmoniche Zorza, e percussions intonadis une vore bielis di Gabriele Rampogna. Musiche di De Andrè rangjade dal mestri Sivilotti e cjantade de mitiche Mauro, la Cristina dai FLK.
In plui vôs di De Maglio e doi soi arlêfs de Nico Pepe: la brave Chiara Donada e Giuliano Bonanni il legnôs .

La spiegazion dai atôrs e je curte e cjape i sintiments e subite larc ae musiche. Li la vôs de Cristina e salte fûr in dut il sô sflandôr. Il côr al reste un pôc platât e i cincuante di lôr a son strassâts par cjantâ tant pôc.
Lis cjantis di Faber a son voltadis di Ennio Çate, Zampa, ma no la ultime de serade che Cristina le cjante a voi sierâts. Khorakhanè, voltade di Stiefin Montel, le à pui che digjeride, oramai la cjante come che e fos sô.
Pe prime volte o ai scoltât ancje il assolo che tal disc di De Andrè lu fâs la sô femine Dori e in conciert le faseve sô fie Luvi. La vôs scure e cjalde di Cristine si rimpine e lant di cjâf rive fin lassù. Ca e là il mestri Sivilot al met tocs musicâi ispirâts a lis melodiis des cjantis. Un conciert là che si è podût scoltâ gjenovês e furlan, lenghis che si tachin e che a cjantalis insieme, ben e sunin.

"Nati in casa" spetacul di vuê, nassût tal 2000, cun cualchi centenâr di replichis e propite par chel cui timps juscj.  Une storie di feminis, di fruts, di nassi, ator dal mistîr e dal jessi di une comari.
Auditorium Menosso di Sant Svualt plen, tantis feminis indenant cui agns che si visin, che son nassudis in cjase, parcè che fin a ducj i agns cincuante lu si faseve, feminis che a scoltâ a àn la lagrime, e patissin, e ridin,  parcè che san, e àn provât.

 Di cemût che une comari mude i destins cul so lavôr umil e dismenteât. Giuliana Musso bessole nus conte cemût che si nasseve, in cjase, tant diferent dal dì di vuê che al capite par solit intune nete e frede sale part di un ospedâl.
Biel delicât, poetic. Nissun cliché, nie tambûrs, nome tenarece. Si studin lis lûs e reste une cjadree  e jê, une femine cu lis storiis di contâ.
Si scomence cul contâ il nassi intun ospedâl, voi che studiin, mans che tocjin,  la femine che devente mari, doprade al fin de profession mediche. E po la domande "cemût fasevino lis feminis prin a parturî?"

La conte gambie regjistri e la atore e devente la comari dut al gambie. A son storiis di une volte, comari che va in biciclete, aghe di scjaldâ oms che vuelin “il mascjo”, nonis che prein il rosari, fruçons di vite, vôs di comaris di Padue, une furlane di Pordenon
E samee di viodilis li cu la lôr borsute cui fiârs, i imprescj dal mistîr, il lôr savê, la lôr pazience. Giuliana Musso conte la fadie de puare int, di chês che àn provât: "cuant che si rive al otâf frut e je plui fadie a messedâ la polente che a parturî”.

Ultins pôcs minûts dedeâts al parturî di vuê cul 39.7% di nassûts cul part cesareo, che al capite nome in Italie, e nus lasse cussì. Une ore e mieze di monolic cence padin, cul nestri flât picjât intôr di jê. Brave.