Brâf Furlan

Un articulut dai Wu Ming. Al si cjate ca (si clame New italian epic). Dut ce che al côr ator di lôr a mi intrighe un grum. O ai let "Manituana" e "54" e alc altri tipo Giap, ma al è il lôr progjet di une inteletualitât provocatorie, anarchice e iperboliche che al à grande atrazion.
Chel che o volevi meti in mostre al è il gnûf document burît fûr. O podeis lâ a leilu, al merete.
Ce che al dîs?
In struc, che la narative italiane si è tornade a meti in moto.

Alc al sta sucedint. Il fat plui clamorôs al è il Gomorra si Saviano cheal è un dai libris plui famôs dal mont dal an passât. Ma samme che si inacuarzin plui dal di fûr, dal forest che no di chenti. In Americhe lu tachin a clamâ "Gnove narazion epiche".Epic tal sens di corâl, narazion a la larghie, che e met in zûc la memorie e il futûr.
No si cjacare plui di contaminazion ma  si sta in bande, plui indenant, dal gjenar di sburte e si scjavace inaltrò e plui in là. E je une maniere di contâ cjalde, cuntun font etic.
Tal mont dal contâ al sta nassint alc, il dificil al è inacuargisi.

Durmivi, vuê, in machine tor trê, cjalt e il tran tran de autostrade che al niçule. Cun cualchi centenâr di chilometrots su la gobe, e vuidave la femine e jo mi insumiavi, cu la bave sul ôr de bocje in bande,  sudant, pierdût.
No sint plui chel rumôr di ruedis e motôr, chel sdrondenament regolâr. Mi scjassi chel tichinin e o mi inacuarç di alc che nol mi cuadre: - Ce sucedial?
- O sin fêrs di mieze ore. 
- Cemût fêrs?
- No si môf nie.
- E chei di che rie làju parcè corino?
E jere une altre rie che si moveve e dulà che o jerin nô nie, trê camionons, ongjarês e un cec incjastrâts un in chel altri e nô tal mieç e nissun di chei che al podès movisi.
O ai scugnût fermâ la corse de rie buine, fâ manovrâ chei fêrs e disgredeâ il dut.
E chest al è nuie. Tant che o mi devi di fâ chei fermâts a rosein. Chei che prin a corevin, fêrs ancje lôr, a si incazin. Smonte une siore, ocjai neris e tirade fuart, che mi dîs cemût mi permetio jo, che jê e je ferme, e prin e coreve, dut par colpe me, e jê e à fruts piçui e che jo o stoi fermant ducj, se no soi deventât mat.
In chel un camionaro blestemant in ugro finic al dismonte e mi berle te sô lenghe. Jo tal mieç des machinis, si visaiso chel dal Cynar, Calindri, compagn di lui, cun ducj fêrs che mi cjalin e doi che mi berlin te orele.
In chel denant la file si môf, si slungje la buse o fâs moto a la femine di movisi par intrufulâsi e o lassi il camionist ugro finic a spiegâsi a motos cu la femine in tîr. Lôr tal mieç dal asfalt e jo che o monti al svual come Tex sul cjaval.
Che a sedin ancjemò là?

O cjapi da "Il Furlanist" e o met in struc ancje achì di me parcè che cheste analisi dal vôt de Regjon  mi samee un grum interessante. Al è firmât Zeno Pessoa, un nick gnûf che al plate une identitât une vore curiose.

Furlans e meridionâi a àn un pont in comun. A votin i lôr nemîs. Cuant che un popul al fâs chest, a si scugne domandâsi se al è pardabon un popul bon di valutâ il so distin o nol è invezit une schirie di individualitâts che a repliche a nivel locâl, cence nissun distingui, il vôt nazionâl. Une robe che achì di noaltris e je capitade di sigûr; lu disin ancje chei che àn vint, ven a stâi Menia (cul gjubot des frecis tricolôr). Ma nol è dut achì, sigûr che no. O sarin sotans di Milan, per me al è talmentri clâr che gambiâ un centralisim par un altri, e par zonte sussidiari, al è un pessim afâr.Cjalant i dâts disagregâts par comun (robe che consei di fâ) alc al ven fûr. Ven a stâi che e je stade soredut la provincie di PN che no viôt la ore di lâ cun chê di Trevîs (la camere di cumierç l'an passat a voleve fondisi cun che di trevis?) a mandâ un segnâl.

A part un pâr di comuns, di fat il PDL là jù al passe pardut cun percentuâls tor al 60% cun chestis spicis chi: Brugnera 76,74%, Prata 75,86%, Pasian di Pordenon 71,43%.

In provincie di Udin invezit la situazion e je plui variade e risultâts dal gjenar a no 'ndi è nancje a Manzan o Nimis (che pûr rivin al 67%). Ciert, Tondo al à vinçût ancje te nestre provincie, ma no in maniere cussì largje. La basse e la mont (pûr vint Tondo là sù il so "Headquarter") àn votât di fat in maniere difarente. Il Friûl di mieç (che cualchidun magari al pense che al sedi "la scune de lenghe") invezit, votant come che al à votât, al à mandât in consei chei che pensin e disin che il furlan al è biel se difindût des fameis. E duncje nie gjornâi, no tv, no scuele. No media ma Menia duncje. Benon. Baste savêlu.

Il popul dai outlet, des "Porsche cayenne" e dai mobii vendûts a neri, simpri pront a vaî miserie e a suiâsi lis lagrimis cuntun façoletut tirat fûr di une borse di Prada, di chestis storiis achì a si sbat. E no covente lâ a PN par cjatâ la int cul Cayenne che e vai miserie! La plui part di chei lì, di cierts tamês a no i free nuie...che e sedin di PN, di UD o di Cividât; ciert al è indubitabil che l'ovest de province di PN al à un redit elevât e al vote cemût che si è viodut. Il rest de int invezit, mi pâr, e à pal cjâf ben altris robis e cu la crisi economiche che ven indenant simpri plui ahimè a 'ndi varà.

Ve duncje che in chest cuadri achì, pûr cui sôi limits (Tav, centris comerciai e v.i.), che o ai pôre che no si gjavarìn vie nancje cun cheste pene elete, la zonte Illy e jere une anomalie. Une anomalie di podè provâ ancjemò a doprâ a nestri vantaç.
La realpoltik di vuê a no à spazis par nô, vin di vuadagnâiu. O sarìn strategjics o tantis des nestris pocjis concuistis a saran scanceladis. Pal moment o vin fat mieç pas indevant e doi indaûr. No je une novitât assolude però; a fâsi mâl di bessôi noaltris furlans, si sa, a voltis o sin dai vêrs fenomens.

Zeno Pessoa

Il candidât president Pieri Fontanin al cjacare ator par furlan. Biel sfuarç, in campagne eletorâl lu si fâs par cjapâ vôts. Un che al à fat il sindic, il president de Regjon e il parlamentâr al podarès stâ ancje a cjase: al à za fats vonde dams e po dopo nissun al è indispensabil, mancul di ducj un cussì plen di velen.

Ce aial di dî su la cuestion provinciâl: la voie di tornâ a partî! Ce varessial di dî che al vûl stâ pognet? Al à voie di meti a puest lis scovacis, lu spietin par viodi se al ves di vinci ce che al cumbine. I soi compagns a son agnorums che nus secjin lis balotis. La sô classiche conclusion "Fuarce Friûl" e à di jessi di ducj, no nome dai leghiscj e dai compagns di bevudis. Fuarce Friûl al è ancje gno.

Jenfri i eletôrs a 'ndi è un 20% che no sa ancjemò ce votâ. Tra chei che a son sigûrs di votâ, Fontanin a lu dan al 49% , cuintri il 42% di Travan, al cres Marzio Strassolt che, cul so 5%, al fasarà in maniere che il leghist nol podedi vinci al prin colp. Par chest o fâs il tif pal cont. Fuarce Strassolt, slungje il zûc che cussì tu ju mandis al balotaç.
Il Travan Diego, doi fruts, om in cjâr e cul cerneli viert, voi che incein e pîts par tiere, al è un orsat che nol mole  cun cuindis dîs di plui al po fâile. Al à une aziende che al è un programe eletorâl: int zovine e savinte, cjolte a timp plen, cun incjariis di responsabilitât, gran part feminis.

Daspò dal svarion de leghe cu la sô lady Guerra cualchi colp lu àn pierdût. Une robe mi pâr sigure: l'acuardi tal centri drete nol è un gran. 

Soi dacuardi cul Dree (post prime di chest), come al solit al à reson. Dut câs o voi indenant cu la riflession di Siegel Lee, autôr di "Against the machine".

Cui che al scrîf un blog - al dîs - al met in mostre e in vendite il so privât. Al à pôc a ce fâ cu la libertât che e je leade a la veretât, e su internet  - seont lui-  di veretât a 'ndi è pocje. Su internet si vûl jessi come chei altris, il biel dal zûc al è platâsi e mostrâsi miôr di ce che si è. Il fat di jessi platât daur di un nick name ti permet di no vê inibizions. E ancjemò - simpri lant indenant cun Siegel, al dîs e mi cjape avonde che - su internet a no si invente nuie ma nome dut al si ricicle. Tancj blogarins no fasin altri che zontâ rumôr al rumôr di font fasint di dut un unic grant bacan.

Si  scrîf su internet cence control, lassantsi lâ a pinsîrs cence confront, cence une espression autentiche.
A sparissin lis diviersitât invezit che incressisi.

Il fat che nome internet no puarti lontan mi cjate dacuardi. Ma al è ancje vere che il confront al è di tantis bandis e lis opinions cence confront, tal dibatit, no àn spazi larc. Internet come l'ordenadôr che o stoi doprant cumò a son dai mieçs che mi coventin, ma no àn di deventâ la maniere di esprimisi come che a crodin tancj zovins. Se jo no ves une mê forme autonome di scrivi al di fûr dal blog, e une mê forme di leâmi e di dispeâmi, di cognossi e di discognossi, no varès nuie di meti in comun intal blog. O vuei dî che o pensi che, come tal me câs, internet al è nome un toc di ce che o buti fûr di me, e o conti sul fat che nol sedi nancje tant il miôr.

Finudis lis mangjadis di Pasche, par parâ ju il dut, o invii une riflession sul mont di internet che mi cjaparà uns doi trê post.

O vuei fâ une riflession, (cuntune peraulate une riflession epistemiologjiche),  su ce che si dopre par tignî vîf un blog e sul so significât come mieç. O cjapi l'ispirazion stiçât di un articul di Lee Siegel (Lee Siegel cuintri Internet; interviste al Wall Street Journal: Gnûf atac al web e a lis sôs manifestazions) che al à pene scrit  "Against the machine". Chest siôr al conte che secont lui Internet e je masse preseade tant che nissun al olse criticâle. Internet e je la prime place sociâl che puarte l'individui a jessi plui impuartant de societât che al à dongje, lui le clame la  "Me generation", la gjenerazion voltade al se.  Al spieghe: - Cuant che tu sês su internet, tu fasis, al stes timp, plui robis: tu mandis messagjins, tu scoltis la radio, tu scrivis alc, tu âs alc altri par consultazion, tu discjariis une robute, tu spietis une e mail, tu rugnis cuintri il spam, tu prenotis un libri, tu ciris su e bay la ciclette che ti covente, une cucade ai gjornâi e vie indenant.
Ven a stâi a tu ti usis a vivi intun ambient che al samee plen di int e tu ti sintis passût di relazions. Ma al è dut plen di fantasimis, e 'nt tu sês plui bon di fâ nuie, tu vâs daûr a ce che ti permet une machine, a ce che ti permet Bill Gates, a ce che ti vuelin proponi parcè che a cognossin i toi guscj, ai bêçs che tu spindis in tecnologjie e a trop che tu sês bon di doprâle.
Su internet - al va indenant il siôr Siegel - no son principiis umanistics, ma al è il trionf de societât dal cumierç dal egoisim, dal narcisism di ognun sierât tal so spazi virtuâl. Si va daûr al capitalisim: fâ plui bêçs che si po.
Il ultin sbroc dal capitalisim - par chest siôr Lee - al è ridusi la vite di ognun, la vite interiôr, in marcjanzie. E internet - al siere Siegel - al stâ rivant a fâlu.

"Il blog è come il Tamagotchi: se non ci badi, dopo qualche giorno muore". Trente spagnolets

Soi cuintri lis blogstar di mode, e lis star di ogni sorte, par principi. Cuintri chei che doprin il lôr podê par metilu tal blog (si il podê, chel di jessi di mode, di jessi fighets). O soi cuintri chei che doprin il podê di blogger par doprâlu a fâ i fighets (a fâ i libris sul blog).
Se zontin che il Tamagoci mi fas sen di cagâ, o ai dite dut.

Il blog al è un gno spazi, i scrîf parsore se o ai alc ce dî. Cuant che o pensi che a cualchidun al podedi vignî bon, o stiçâ un pensîr,o ancje nome scjampâ une riduçade piçule.
Tal mont dai Blog "0 coments" al vûl dî che a nol interesse a di nissun. Ciert nol fâs plasê vê "0 coments". Ma a 'ndi è di piês te vite.

Ancje cun personis che o sint ce tant dongje o scrîf nome cuant che o ai alc ce dî e cuant che mi ven la voie, no rivi a sintîmi sburtât... se o voi a cjatâ cualchidun lu fâs di buine voie, cjapâimi cussì.
O mi spieti che ancje chei altris a fasedin come me, che a vegnin te mê cove nome cuant che a 'ndi àn voie.

Cuant che un operari al mûr i politics sedi di drete che di çampe e di centri a si indignin.
Cuant che un operari al mûr doman o passan doman Prodi al proviôt cuntun decret leç.
Cuant che un operari al mûr Veltroni al met in liste un industriâl, ma ancje un sore vivût a la Thyssen Krupp.
Cuant che un operari al mûr il President de Republiche al patis e si augure par television.
Cuant che un operari al mûr Maroni al dîs “No je colpe dai guviers, parcè che lis leç a son”.
Cuant che un operari al mûr nissun al cjacare dai precariis, di ce che a subissin, dai ricats, dai estintôrs vueits, che se no “a van a cjase”.
Cuant che un operari al mûr il paron al à bielzà metûts i bêçs in bande.
Cuant che un operari al mûr la vedue e i fîs finissin in mieç a une strade.
Cuant che un operari al mûr i sindacâts a metin su un siopar di dôs oris di solidarietât.
Cuant che un operari al mûr la colpe a je dal elmet, e si le à cirude.
Cuant che un operari al mûr se al si lamentave pe sigurece al vignive subite parât vie parcè precari.
Cuant che un operari al mûr al faseve un lavôr pericolôs, al veve di capitâ.
Cuant che un operari al mûr si da un premi a chês che no àn vût incidents e no si sierin chês che lu àn vût muarts.
Cuant che un operari al mûr  al è parcè che la sigurece e je masse costose.
Cuant che un operari al mûr al è un fat di afârs, cualchidun a i à za vuadagnât parsore.
Cuant che un operari al mûr se fal faseve il politic al rivave fintremai a cent agns.

Vuê a gustâ in frascje, intune privade a Cjampei, dongje al lagut.
Une compagnie di un vincj di nô che in fraie si gjoldevin la fieste.
Mangjative furlane, afetât di purcit de cjase, verdurutis sot asêt e foncs dai lôr. Paste fate in cjase in sorte. La stue e à tacât a fumâ e a àn scugnt spalancâ la puarte.
E po luianie e polente, frico e ardielut fresc.

  E dut ce che al covente, blanc o neri, par parâ ju. Alore i vûl une polse, e nô o disin, prin dal dolç e dal cafè, o fasaressin une cjantose.
La parone e dîs, cun cortesie, che si al larès ancje ben, ma chei altris no sa se a son contents. Che a ducj nol plâs sintî confusion. Che se al è par dôs o trê cjantis al po la ben ma no di plui. Si cjalin un lamp. Vie la ghitare, torne a metile te machine, no si cjante. Se a ducj nol plâs, no starin a fâsi taponâ la bocje. O sin di chei che, se o si inviin, e o stin chel moment. Po scugnino fermâsi sul plui biel? Nol va ben.
Se voleve, e varès podût domandâ a chei cuatri sintâts in bande. Jê no lu à fat, nô nancje, ma la prossime volte o gambiin puest.

Sul MV a si son inacuarts che son ancje furlans che scrivin sul blog. Disin popul di navigatôrs. Navigadôrs di ce? Di frico e di tais? Plui di dusinte. Ma in furlan vincj. Di atîfs pardabon oltri al furlanist a 'ndi è cinc o sîs.

Dibatit se Trente spagnolets  che al scrîf par talian e ogni muart di pape par furlan al sedi puarte vôs dal friûl parcè che al è chel con plui contats.

Par me Trente spagnolets al è un panzon e i puce il flât!

Vê  tancj contats par talian e cjacarant di vaffacanzzismo e frice al è facil, ancje scrivintlu in bon talian.

 

Soi dacuardi invecit che chel dal Dree  al sedi coragjôs e inovatîf.

Ce che il MV nol dîs al è che su tantis robis planc a planc il web e i blog, i stan gjavant la tiere sot dai pîts.

E che une informazion drete e sclete scomenze a passâ ancje de rêt saltant il MV, ancje in Friûl, ancje par furlan.