Brâf Furlan

Culture furlane. Jo o ai une mê idee.
Culture valutazion 10 e je chê che po lâ in dut il mont. Mi ven tal cjâf Pasolini, ma di cumò, Vicino Lontano, Far East Film, Mittelfest, e robis cussì.
Une valutazion di 9 e je chê cun rilevance nazionâl o sovranazionâl limitade, o di nichie, alc che po rivâ in Carinzie in Slovenie, robis come cine, fumuts, libris, FLK,  Arbe Garbe, cualchi coro che al zire pai Fogolârs, cualchi manifestazion che voie o no e je cognossude come che di San Denêl, Friûl Doc.
Une valutazion 8 e je une che à rilevance regjonâl, chês che fasin movi la int fin a Travis o a Çarvignan se al è il câs, un biel conciert, une mostre, une ricorence.
Un biel 7 a chês robis che magari meretin ma no àn un non impuartant, no son cognossudis, no movin tante propagande ma che fasin gole di lâ a cui che al è plui atent.
Chês robis dal 6 a son chês di paîs, che si movisi par amicizie, par comuditât e ancje par dovê.

Jo o ai passion di chês robis dal siet: parcè che si po sperimentâ a coscj bas, cuasi a nuie, parcè che àn artiscj e public tacâts, parcè che la veretât di une robe la si po palpâ.

Daspò un periodi di polse e riflession e torne la Comugne numar 14 e 15 in cubie. Chei de  La Comugne a pensìn che la strade par fâ sì che il furlan al sedi une lenghe liberade e sedi ancjemò lungje, e che soredut che no si à ancjemò vût la pussibilitât di cognossi ad in plen la gnove produzion leterarie.  La Comugne e vâ indenant parcè che se la Storie ogni tant e divente invisibile a restin lis storiis di contâ.

A son autôrs scuvierts  da La Comugne, cressûts dentri di un ambient segnât de sielte dal furlan tant che lenghe no omologade, cuntun spazi comun (une "comugne") pai gnûfs autôrs furlans. Autôrs che no àn dome scrit par furlan ma soredut a àn gambiât di plante fûr i argoments dal scrivi par furlan.  Lis storiis contadis di chescj gnûfs autôrs a son lontanis de civiltât contadine ma insedadis tal Friûl e tal mont di vuê.  Il cjamp leterari al è pe dificoltât sparniçade di lei e scrivi in marilenghe dificil, al è un spieli di une identitât cirude che e je daur a cjatâsi, che e je cussiente e fuarte di se, tant di volê lâ stradilà i confins strets dulà che e je stade tignude masse a dilunc.

La Comugne, gjornâl leterari sot dal coordenament di Pauli Cantarut, e je une publicazion  Kappa Vu. Intant o us conti alc dal numar 14: prin di dut  è insiorât des fotos di Paolo Jacob che a mostrin une part di Udin  daur a savoltâsi, une riflession sul mudâ urban e su ce che sarà chê part de citât.

Dôs lis traduzions. La prime di Pauli Cantarut che al volte Ales Debeliak, che al insegne ae Universitât di Lubiane, intun saç su la identitât. Chê altre une conte dal francês di Marcel Aymè, il Passemûrs, voltade di Fabian Ros.  In evidence po une conte gotiche di Checo Tam, scrite a penin e in riproduzion fotografiche, une robe di no crodi. Mauro Daltin al à une sô conte curte, un sghiribiç di afiet e di polse.
Il cuarp dal numar al è jemplât di un saç di Sandri Carrozzo sul furlan e l'iperfurlan (o furlan iperpûr).

Rassegne dal Blog "Il furlanist", soredut parcè che la ultime batude  mi à fat propite sbudielâ dal ridi. Une batude sintude vuê: Honsel a Udin? Une gote di bon profum intun mâr di mierde, l'odôr che si sint al è nome un!

"Circondât des armadis romanis e padanis, in Friûl al resist par furtune un paîs di gjai guidat da Honselix.
Udin capital dal Friul e je restade l'unic Soviet... Ancje Rome si è deliberade dal centri-cjampe...  Se Honsell al ves vût rispet sacrâl de Universitàt di Udin, nol varès molât el mandât retorâl pe cariere pulitiche...
E je propite vere che chei di Udin a son i plui stupits dai furlans... in chest a àn siguramentri dirit di jessi capitàl, la capitàl dai stupits... Fevelant di visitors, Honsell c'he al è rivàt a Udin nome par fà cariere universitarie (sielte legitime la sô) al à cjatât un grum di cojons che, iessint lui forèst, lu àn considerât paladin dal furlan. Iustamentri Honsell ju à doprâts... Migo mone!

Con Honsell Udin e à un grant futûr. Cun Cainero o varessin vût dome Alpins e cragnis. Beh si, cence metix il friul no vigneve fur cusì, se continuavin a taconâsi tra cusins a saresin già sparits cun miars di taris gjenetichis... Cumò o crot che cun lis politichis di Tondo o varin un grant futûr come etnie taliane.

Tachin une sotoscrizion par comprâi une montadure gnove al ex retôr, parcè chê che al à cumò e fas propit cagâ!"

E je jessude Patrie, il gnûf numar de Patrie dal Friûl par un Friûl plui furlan. E je ancje une interviste fate a mi dal Dree. Il numar al è seriot e la mê robute e  cirive di jessi lizere. O tachi un toc. Pal rest lait a leile sul gjornâl e se no lu vês fat, abonaisi!

Il to al è il prin vêr blog par furlan. Di fat al è une sorte di «diari personâl», la definizion comun che si da pal «blog». Cemût âstu tacât?  No sai se al è il prin vêr blog, sigûr al conte alc di me. O ai tacât stiçât de mê passion pal furlan. Mi soi dit: - In chel mâr grant, parcè no tacâ ancje jo? Po volevi capî se al è chel grant divertiment che al samee. Cussì o messedi riflessions e coments su la atualitât cun robis che o viôt, spetacui o piçui fats di vite di ogni dì. E o cîr cui “post “di jessi inzornât.

Tu tu sês ancje scritôr, su di ce robis lavoristu?  Voi daûr dal moment, o ai tacât dal 95 cuntun zornalut dal paîs a trascrivi ce che al butave ju a man par furlan un gno amì che nol saveve nancje ce che al jere un ordenadôr. O ai fate une interviste a un vicin di cjase su lis storiis dal paîs, soredut contant la sô vicende partigjane. O dopri i concors leterariis come sburts par gjavâmi la tedie e par regolâ i timps. La miôr sodisfazion e je stade un premi a Glemone: alì o contavi di doi furlans che si son cjatâts sot Vignesie te bataie di Patràs; metût in recite inte sagre dal paîs.

Ce ti aial dât un an di rêt?  Dal sigûr une gnove maniere di jentrâ in relazion cun int foreste, e il plasê di tornâ a cjase e di viodi che a cualchidun i è plasût ce che o ai “postât”. O ai tacât cul cirì ce che al jere di furlan ator: pôc. Po leint Il Furlanist o ai pensât che alc o podevi fâlu, ma come un cualsisei Brâf Furlan, nie di plui. Mi à dât une costance e une scriture plui svelte, provant a rispietâ il furlan scrit, cul jutori dal coretôr. O ai la ocasion di scrivi e di fâmi lei cence tamês.

Consearessistu di vierzi un blog in marilenghe?  O mi maravei che tancj che fasin i côrs di lenghe no lu fasin. Cuntun furlan scrit di principiants si po za fâlu. Bisugne tignilu vîf, e lâ a cjatâ cui che ti comente. Al jude a fâ esercizi e a cjatâ un tic di ironie. Fâsi lei nol è facil. E nol à di deventâ un sacrifici. No si à di deventâ sclâfs dal contadôr: un me amì lu à gjavât, jo dal “template” che o dopri no ai tocjât nuie, ancje parcè che no sarès bon.

Al à dite di jessi simpri stât «atent al sociâl par vie dai soi principiis morâi e religjôs». Al è stât ativist des  Acli e ai moviments dai students. «Di furlan cul svant di jessilu, par dâ un contribût a la Provincie e mandâle tal futûr, cun voie di lavorâ e inovazion».

Râr sintî un politic spiegâ di jessi furlan cu la braure di jessilu. Se al è di crodi, al sarà di chi indenant une diference di plui, in plui des diferencis di ispirazion politiche, religjose e di gjenar ancje il jessi o no furlan une diference di meti sul plat. E se la prime declarazion e je cheste, jo i crôt!
Avocat, imprenditôr, muse gnove.
Si clame Diego Travan.

Chê de strache. Si rive a poiâsi tal jet che no si la fâs plui, cence lavâsi e cui vistîts gjavâts a madrac vie, si plombe intun sium font agjitât cu la bocje vierte che dal cjanton sbavacje sul cussin. Cuant che si jevisi si disduliisi in ca in la i braçs e si fâs une gulizion ad abuntaziam par metisi in vore.

Chê dal remenâsi. Si barufe cul jet, no si cjate padin, si cuestione cul cussin, si pitiche cui linçûi, lis cuviertis a colin e la schene e je distaponade. Si à mo frêt e mo cjalt. Un cuart di ore in poltrone, la Tv impiade e studade che al è nome chel che al spieghe Nettuno. Si jevisi plui stracs di cuant che si è lâts intal liet e la zornade e je bielzà inviade stuarte.

Chê dal vieli. As vot al è za che pendole, as nûf al ronfe e as trê tache a cirî la radio, l'auricolâr indulà isal, il cafè tal liet che si sbrodole tal linçûl, e cuant che a son sîs, l'ultin siumut, come i frututs di scune. La femine e à bulît cidine dute la gnot in bande, e jeve dute rabiose.

Chê dal frut. Al duar e al vai, al sude e al tos, si zire e distapone, al à sêt e se al ocor ancje fan, si bagne e si insumie cui voi discocolâts. Po si jeve a la sô ore, come nuie sucedût, fresc come une rose, no si vise un cincinin, e la mari, o cualchi rare volte il pari, che no àn sierât voli, lu cjalin cu la voie di copâlu, di bussadis.

Chê de slachigne. Cuant che il liet al invoie, al è cjalt e nol spiete altri. E tu tu âs nome chê gole li, tu vâs tai linçûi che san di savon e ti involucin, ti spietin e ti cocolin, e tu ti sbrochis dai afans e tu vâs come aghe a jemplâlu chel liet.
E tu ti molis dai fastidîs e tu ti slargjis cence spessôr, tu deventis jet, di no cjatâti plui, di un ben che tu sês frut e lane mulisite, aghe clipe, sunsûr di amante cuiete, e tu partissis dret par un sium che al pas cence domandâti nuie se no di tornâ a inviâsi.

"San Dindin che sunave messe cul cop", lu diseve me none come imprecazion. Cuant che o pensi a Sant Valentin mi ven iniment Sant Dindin.

 La zornade di Sant Valantin e je chê dulà i inamorâts pandin il lôr amôr par i lôr amâts, cun biglietuts regaluts e nainis in sorte.

Si conte che e sedi stade une fieste plui vecje leade a la fertilitât de tiere che po je stade taponade e tacade suntun sant. Di sigûr plui di un a saressin i Valantins e no si sa ben a cuâl si cjale forsit a un di Terni decapitât dai romans, e dut câs la sfloridure merecane dai ultins agns no à nuie des motivazions romantichis che si sintin ator.

Cjalait ancje ca.

Mi fâs malincunie chest jessi obleâts a fâ regaluts e a declarâ ce che o si sa o no si sa. Se jê lu sa ce lu disio a fâ. Se no lu sa o e je sorde, vuarbe e çompe, o pûr no vûl savê 'nt.

Mi àn vût domandât se o conseares di vierzi un Blog in marilenghe. O vevi voie di rispuindi che prin  bisugnarès che cualchidun al vedi voie di lei. Di lei par furlan. Lis monadis che si scrivin par furlan. E se nol à nuie di miôr di fâ. Dopo o ai pensât ben e mi soi dit: Tu ti stâs par dâ la sape sui pîts.

Alore rispueste diplomatiche. Si lu consei (simpri se un al è stuf patoc di fufignâ cu la morose, di lâ al cine, di mateâ culis nâfs te butilie (parentesi jenfri la parentesi: morose, parcè âstu stufât il to morôs, scuse, âstu finûts ducj i toi trucuts?) e vie indenant ).  A pat che lu tegni vîf: viodi chei cul ultin scrit di mês indaûr al fâs malincunie.

Jo o soi dal parê che si po sperimentâ, e che se il contignût al vâl tant, la forme i côr subite daûr. La lenghe (a disin i puriscj de lenghe) no si po tirâle in ca e in la. Se par talian nissun nol scrivarès "squolla" alore parcè in furlan si po scrivi ce che si vûl?

Jo o dîs che o scrîf, sul gno blog, ce che o vuei. Di chês altris bandis, in cjase foreste, si cirarà di jessi mancul cialtrons.

Dut câs, furlans che leiès e che no vês un blog, tant o savês doprâ il ordenadôr, o varessis di scrivi, e di lei di plui par furlan.

Pitost che vê pei su la lenghe

mangjarai nome pan e renghe

se no ‘nd’ai pan, ancje polente

renghe par ducj s’al covente

e gjavinsi chel biel pês fûr dai dincj

se ‘nd’è bisugne renghe par ducj

No soi pe anti politiche, ni par un principi dal jessi anti. Se si podès jessi cuintri i cretins lu sarès. Se si podès jessi cuintri la miserie ancje.

Mi plasarès savê cui che o sin come furlans. Se o vin i imprescj par tirâ indenant cun dignitât, ironie e identitât. Cence ingredeâsi intune identitât Leghiste friulaniste, razziste,  che cjale nome al indaûr.
O disarès une identitât furlane vierte al mont.

Come furlans o sin plui provinciâi di ce che al samee e, se o fossin bogns di cjalâ al miôr ancje fûr di ca, ciertis monadis no si fasaressin.

Mi plasarès savê cui che son i blogarins (il furlan che al matee cui blog) e ce che vuelin cui lôr blog, se al è un savê propite, che al dopre il web par un di plui, che in altre maniere no si rivarès a vêlu.
No volarès che il tignî un blog al sedi nome par dâ sodisfazion al gno jessi esibizionist.
Par cumò o resti ai fats: il gno blog intun an al è vîf ma clopadiç. Un pôc diari, un alc a cjalâ il Friûl, un nie a pensâi par sore.  Ancje sui blog a si à cûr di jessi sierâts al propri ort, e jo no lu vuei.

O crôt che la furlanetât e podedi jessi vivarose fintremai che cultôrs, atôrs, paris e nonos, maris e fruts, le dopraran e scritôrs, poetas e inteletuâi si daran plui di fâ a insiorâle, che no a barufâ jenfri lis clapis su cui che al è plui furlan di chel altri.

Cualchidun di poc spirt al cjale il dêt, la virgule, il puntin.
La sostance? Cuale sostance.