Brâf Furlan

Cuant che si è malâts la part dal dâsi coragjo e je tant impuartante tant di chê de terapie cu lis medisinis.  Alis medisinis pe plui part a pensin i miedis. Jo o mi fidi de diagnosi simpri, dal scrupulâ massime se je cun alc che no sai, cualchi gnove machine che samee il non di une caramele, tic tac pet pot.

A proposit, un me amì dopo che al veve spietât mês par fâ une tac o simil, chê che si à di lâ dentri un siluro e stâ a tu per tu cu la machine che ti si siere la visuâl par une mieze ore, cuant che al à viodût là che al varès vût di stâ e par trop timp, al à dite: - Jo alì dentri, par mieze ore, no grazie!
E dret a si è inviât cu la infermiere che i coreve daur.

Pe cure o fâs par solit mancul di ce che mi disin o intune altre maniere.

Cuant che la malatie no je di passaç, come une polmonite o un braç rot, alore e je croniche. Cuant che tu sâs che chê malatie tu le varâs par simpri, alore tu âs di fâti il voli, dâti une reson, une spacadine e vie indenant. Guai cussì no.

Cence dubi la part psicologjiche e je che plui ingredeade. Il savê che la tô imortalitât e je finide al è un brut colp. Prin o dopo si scugnive rindisi cont dal propri jessi finît. Ma tocjâlu cun man e je une biele scuvierte.

Al è il dâsi coragjo e tornâ a inviâsi e l’imparâ a convivi cuntun alc che nol è plui chel di prin e, che si sa, nol tornarà chel.Tancj a le cjapin a la lizere e magari si strapacin, tancj a si avilissin e a riscjin di butâle in depression. E cussì la situazion e devente plui penze. Par chel al è ancje un cualchi jutori di un psicolic.

O 'ndi ai cognossude une (une biele fantate) che e je specializade a stâ dongje a di chei che àn une lesion fuarte al fîl de schene. Jo no sai cemût che e fâs, ma no mi le viôt lizere la cuestion tal spiegâ a un che fin prin dal incident al jere un bulo  che di lì indenant al sarà dutun cuntune carocele.

Par lis mês nainis, ben o mâl, o scugni jessi dispes par ospedâi.
A lu viôt fin cun simpatie pe prime volte. Prin mi jere za fastidiôs l'odôr. Cumò mi è familiâr e cuotidian. E je, si, une atmosfere, un pôc di mîl, tacadice. Ducj che si domandin, un cul altri, cemût che a stan, cuissà se i interesse pardabon.
E je cualchi plantute metude par abeliment che stente a sorevivi, manifescj picjâts che a son alì di cualchi an. E dutis chês infermieris, che a son simpri un biel viodi. Jo o buti la peraule simpri par furlan e ducj, pazients e personâl a mi rispuindin. A un dotôr che i ai contât la mê passion pal furlan, mi al à dite di vê scrit un articul sientific par furlan. O soi lât a cirilu e al è ca. Compliments pe marilenghe!
A vê vût bisugne, bisugne dì che dut il personâl al è di laudâ e no pôc.
Di fûr dal ospedâl o ai viodût  i cartelons cu lis listis des elezions politichis: cuindis? Masse. E ce nons che a àn!

Se o ai di cjatâ alc di stuart, o lu cjati di fûr: tal parchegjâ lis machinis. Pussibil che in chei puescj a sedin tantis machinis. Che ducj a vedin di lâ tal ospedâl cu la machine? Che a vedin di metile ducj il plui dongje che si po? Parcè i bus e i puescj pes bicis a son vueits?

Afermazion individuâl doprade par esprimi une opinion o une valutazion, che e va plui in la nome dal fat. Une operazion logjiche che da dongje in maniere positive o negative un sogjet cuntun predicât.

Cu la letare grande, Judizi , si riferìs aromai par ducj al Judizi universâl, o a une rapresentazion di chel aveniment, il Judizi di Michêlagnul.

E je ancje une valutazion di cemût che il frut al va a scuele butade ju intun test curt. Inte justizie il judizi al è come dì  il rivâ a une soluzion juridiche.

Il judizi al è par Kant  la union di un predicât dulà che il concet dal predicât al è dentri il concet dal sogjet e alore il predicât si po gjavâlu dal sogjet.

Jo no sai trop che o 'nd'ai. No sai se chei che fasin il zîr dai super marcjâts par cjapâ un scont ca e un la, a àn plui judizi. Se chei che lassin i fruts denant de television oris a 'ndi àn. O se chei che prin di maridâsi a provin dut ce che si po cjatâ e rivin a cuarante cence vê un peçot di famee. Ogniun al à la sô sielte

Jo vuê o ai un pôc di  judizi di mancul. Un dint di mancul.

Lavôrs in vore. Vuê mê fie e fâs disevot agns. Ju spietave. E à inmaneât un triduo di festegjaments che nus mene drets fin a domenie.
Al è un biel travuart. Disevot agns indaûr, tal ospedâl di Glemone, il miedi voleve parâmi fûr parcè che mi mancjavin lis gjambis de emozion. Nol veve timp par viodi di me, al diseve. Al veve ancje reson, ma no volevi pierdimi l'aveniment.
Cumò o volarès dai un vie, un sburt parcè che savedi che il mont al è so e che à il svant e il dovê di pleiâlu, se po, cence lassâsi pleiâ, plui di tant.
Ma son discôrs che no ai voie di fâi, la vite i pense za a patafâle e la fuarce che à e vares di jessi vonde par gjavaissile.
Alc al gambie: votarà, fasarà la patente, si firmarà lis justificazions a scuele, e vie indenant. Sarà par cuissà trop, e magari cussì no, cence un franc te sachete. Benedets i nonos!
O sai, come pari, che ce che o ai semenât al è fat, dut il rest lu fasarà jê, ce che e po e, sperin, ce che e vûl.
Bon complean Martuffi. Dai dentri, in cul a cui che ti vûl mâl, cin cin cun chei altris. Ti auguri une buine vite, e no stâ a vaî cuant che tu ti cjapis di alc, che ducj lu capissin che tu sês une paste di pan, sot de tô fuarçate monstre, e a ciraran di freiâti. Nô o sarin dongje di te.

O stoi cirint di fâ un pôc di ordin: ce isal sucedût  vie pal an passât? Ce di impuartant e di tignî a ments?

In Italie: i rumens che samein i piês di chei che son  rivâts, lis tassis locâls che si incressin, Corona e lis sôs mudantis, cui che al scjampe dalis tassis come il campion Valentino, la tiere inmalade che si scjalde simpri plui e no si sa ce fâ. E ancjemò ducj deventâts guardons che spiin pe buse de sieradure i maçaliziis, e Veltroni Berlusconi che tirin il bidon. I muarts sul lavôr, vuê il funerâl dal setim dai brusâts a Torin. E i stipendiis che a son i plui bas de Europe. I zingars che muerin di freet e no molin cu la lôr vite. I merecans che batin sul fat che no o sin malinconics e rassegnâts. E dutis lis tristis notiziis, simpri masse.

E ca di nô la universitât che da di lustri al Friûl, il Tiliment che a àn voie di tabiâlu e une femine che vuide la resistence, te basse la TAV che e fâs tant discori. Il Messâl furlan che nol rive, lis glesiis un grum vueidis, un predi vedul ch'al è pari. Un furlan vistût di neri che al cjacare furlan, une femine furlane sul tet dal mont, la tessare sanitarie gnove che no si sa se intivâle o ativale, lis badants che cence di lôr no viodaressin dai nestris vecjos, e il nestri tai di blanc, che no savin plui cemût clamâlu. La leç sul furlan, i casinò sul confin, centris comerciâi par ogni cjanton, lis mandulis sot dal ombrelon, il passio de province di Udin e il comissari ch'al comissarie ancje la liende president e la sô vice.
E jo che o mi sint intal "middle of nowhere".
Dismentejo alc?

Furlan tant che "popul dûr" cu la famee prime polse e unitât di fonde, par partî a une gare cence confins. Il furlan al è un competidôr pierdint. Al scombat cun ducj, cui amîs e paisans par prin, fuart di invidie e ingratitudine, si judisi par scombatisi. Il sintiment di jessi un popul, di jessi di un paîs, pluitost che di chel dongje pene al tamese la sô fuarte rivalitât, che cussì e vîf tant che i cerclis di un clap colât te aghe, plui lontan al è il cercli dal centri, plui si alce la agressivitât pai forescj ancje se furlans.  Il spieli des tradizions e des relazions al cimente la partignince e il inimicâsi cul forest.

Cheste culture pene cimiade je dure a murî, ma si sta metiçant e je daûr a sfantâsi. Ma il probleme al è che invezit di slargjâsi al miôr de convivence, integrazion e al cjapâ dentri gnûfs valôrs di tolerance e condivision, si vierç al piês che si cjate ator. Il disvilup de economie cul murî des ativitâts agriculis, al à puartât a la crisi dal model di famee che al coventave par produsi, par vivi, par rivâ a puartâ indenant i lavôrs. Paris e fîs no scugnivin plui stâ insieme, cul lâ a stâ di bessôi lis spesis e la libertât a son cressudis ma si è molât di fâ fruts. Ohibo! Un model vecjo e trist al jere vitâl, chel gnûf e vivarôs, bielonon, nol viôt avignî. Ops. Al è alc che nol va!

Cumò al va di mode l'ugnul, il single che al fâs ce che al vûl e al vûl dirits che a jerin coletîfs par se cence cjapâsi intor i dovês. Chest sen di gjoldi al à puartât al finì dal sens di comunitât. La socialitât reste in pîts cun alpins, donadôrs e balon, bandis o coros. La rapresentazion di une socialitât bramade e sfuarçade, cirude e slontanade al stes timp.
Cuant che si torne a fâ vivi moments di tradizion a son une rapresentazion folcloriche fûr de vite (rogazions, processions, coronis ai colâts, discors des autoritâts) cuntun significât simbolic scognossût ai plui che spietin nome il ghiringhel e il tai che par solit a vegnin daûr dai discors.
La vite cuotidiane si cjate al fin ator dal tinel, sdrumâts de zornade, slacâts sul divano.

Cuatri colegàs a gustâ intune betule a Triest, nancje a dî si mangje pes.
O cjapi une telefonade, e je la fie che je ator par Triest, le vevi invidade a gustâ ma, come che o pensavi, no ven. O dîs, a di chei altris, che o ai une fie un pôc sunade. Tra il seri e il mone, le ai butade.
Fin a chel moment o vevin cjacarât di lavôr e di frice, ridint come mats, lant dentri un sexy shop, che e jere la prime volte che o entravi.
Al salte fûr che un al è che si separe cu la femine che e spiete di un altri e la frute piçule in coleghiu a Bassan. Sono ancjemò i coleghius?
Il secont separât al vîf cul fi di cutuardis agns e al à une compagne in Toscane che si viodin ogni cuindis dîs. Chel altri cun doi fîs al è daur a dividisi, secont lui, par colpe de femine che e va cuntun altri. Jo no conti plui nuie dai mei fats. O 'ndi ai vût vonde di chei altris e il risot al mi sta lant di stuart. Il malvasia al nete ju dut ,e je za ore di tornâ a vore.

Daspomisdì, o olsi a dilu, ancje se no si par bon, di mierde.

A cualchidun o scugni ben dilu. O ai passât oris a capî ce che al steve sucedint cence dâmi une rispueste, cence cjatâle. Soi scjampât dal lavôr clamât colât intun davoi plui grant di ce che si crodi.

Pitost che sintî il mâl si preferìs cirîlu. Par no pensâ ai fastidis, stiçâju. Par stâ miôr a chel livel di sopuartazion alçâlu ancjemò. Cence podê cjatâ padin, parcè che plui in su di chel livel al è nome un mâl plui grant. E no fermâsi ancjemò, cence fin, cence une jessude, cence cjâf ni resons.

Sintîsi cussì bessôi che lis robis reâi a deventin pesantis che ti sclicin, cjalcjin masse, tabiin ancje a no volê.
Se son robis che  fasin preocupâ, a lu son za cence alçâ il tîr. Se si voleve dimostrâ alc, lu si è za fat avonde e ancje plui di ce che al covente. Il spac cjapât al è tant che mieç al è vonde, se si podès vê la bachete magjiche e, zachete, voltâ il pes dal mâl e fâlu svolâ lu fasarès.

Jo no sai cemût spiegâ che il ben vivi nol è facil a di nissun, che ognidun nol è contenton di se, dal propri cuarp, di ce che si è rivâts a jessi, che simpri si podarès lâ al miôr, ma ce che al è al è e si po contentâsi.
Il jessi stracs nol zove a tignî sot la fadie e i bruts pinsîrs.

Se il troi da pît de cleve al spaurìs si po cjapâlu di traviers, cjapâlu cuntun pas plui lent, sintâsi ancje a ogni volt. E augurâsi che al sedi il plui curt pussibil.

Tra folcs che àn trat al ordenadôr e telecom che no da la linee o ai une baruffe continue. O sai che tal blog varessin di jessi notazions no propite cussì ordenariis, ma orco boie, se si paie par vê un servizi e la linee se je e côr come un mus e di gracie che e sedi, beh alore lu scrîf.

E lis mês a son bagulinis in confront a ce che i è sucedêt a chê miss di Strassolt!
A je no son fin  rivâts sms che vevin di butâle su in alt tal concors. Pensait ce robis. Bêçs strassâts. Dut par colpe de telecom. Une juste a 'ndi à fate alore, in fin dai conts, cheste benedete telecom!

Le ai sintude a telefriuli. I àn domandât se i displaseve mostrâ il cul par vinci. E à vût il coragjo di rispuindi che je che è sportive lu à dûr e che a son ches secjis sclagnis di anoressichis che lu àn flap e che àn protestât. Par jê e leve ben che i calcolassin il penç dal cûl, scusait la bassece.

Ma va là a dâlu vie, par plasê. Cjare la mê biele Valentine, tu sês ben stupidute e no tu sâs ce che tu disis, e ce solidarietât cun chês maladis di tôs colegas, e ce superioritât, ce finecis!

O ai stât une sere a Poçui a la cunvigne di Pierluigi Di Piazza su  "Dulà cjatâ la fuarce pal futûr".
Un pôc no sopuarti plui i discôrs plui luncs di un tant, un pôc al mancjave l'aiar, o ai patît in chel auditorium.
o ai scoltât la relazion dal antropolic G.P. Gri che al à fate une relazion dute sul donâ.

Par lui il futûr al è tal mudâ dut su une logjiche dal donâ. Al à tra l'altri dite che il furlan, lenghe, al è stât salvât dai contadins e no dai citadins e che la detule che e spieghe ce che lui al vûl dî e je "ancje i cops a si dan la aghe l'un cun chel altri".

Une altre relazion di une femine colombiane, Debora Elena Barros Fince, che cjacarave intun biel inglês, avocat che si spint a pro dai popui indigjeni no nome dal so paîs.Une femine un grum grintose che e scombat cuintri lis multinazionai che vuelin brevetâ il rîs, principâl mangjâ de sô int.

Jê à dit clarementri che fâ solidarietât cui popui come il so par no siôrs al vûl dî nome doprâ di mancul. Doprâ mancul aghe, strassâ mancul energje, doprâ mancul la machine. Parcè che mantignî il nestri livel alt di vite al oblee a tignî puars i popui come lôr.
                                                                                Sarà vere?