scritto da furlan il martedì, 13 maggio 2008,08:18
Se o cjalait ben tes scansiis dai marcjâts o tacait a cjatâ la cuarte aghe furlane. Dopo la Goccia e la Pradis, chê dal Paradîs cumo e rive la Dolomia, la ultime rivade de val cimoliane. I 439 abitants di Cimolais le àn vude in regâl, cussì lôr che a àn une des plui buinis aghis di sorgint a stan imparant a bevile de butilie di plastiche. Lis butiliis poiadis su la place dal paîs a son stadis cjariadis tes machinis e puartadis tes cjasis in mancul di un lamp. Une seconde distribuzion, il Comun le à pandude cun tant di volantin. La prossime volte che a volaran aghe buine, invecit che spilale dal rubinet a laran a cjoile tal negozi di Maniâ. Si sa, dîs puescj di lavôr a fasin comut soredut se si promet che a ‘ndi rivaran ancjemò. Lis butiliis a viazeran di gnot e cussì ancje il fastidi des stradis libaris al è a puest.
O restin il paîs dal mont cun plui butiliis di aghe e cu la aghe dal rubinet plui buine. E de bande des aziendis a la font e je cuasi a gratis (1 centesim al metri cubo, 0,01 euro) e devente aur tal bar.
E je une campagne par sburtâ a doprâ aghe di rubinet e duncje inbrochinle al vûl dî metinle te broche, ma chê dal rubinet.
La aghe di acuedot e je buine, sigure, tignude sot control, e je a bon presit. E no incuine. Une volte par dutis o scugnin dî che si à il dirit di domandâ aghe di rubinet ancje tai locai publics e no puedin rifudâle.
In Italie si à il consum plui alt di aghe in butiglie tal mont cun 194 litris parom (tal 1985 a jerin pene 65) e cul consum i afarons pai produtôrs e la freadure par nô.
scritto da furlan il lunedì, 28 aprile 2008,18:08
Maggiociondolo
avorniello (Laburnum anagyroides)
par furlan:
gjaluçâr, solen o salen, cossat
Fameea: Leguminosis
Habitat: sul ôr des raduris di faiârs e aiars
Rosis: infloriduris a rap
Viodûts i prins in rose dongje a la Maline
scritto da furlan il mercoledì, 23 aprile 2008,07:13
Di agns in ca o vevin vudis lis provis di cemût la tiere si steve steve inviant viers un tamesâ cence remission ducj i ecosistemis naturâi. La sene che o stevin par vivi tal 2050 e sarà che di un doprâ dal dopli plui alt di ce che si po sopuartâ.
Come oms e feminis o vin di domandâsi se o vin a cûr la nestre tiere. Ce che o podin fâ, parcè no lu stin fasint.
A son trê lis robis di tignî cont: energjie, mangjative e aghe. Energje de cjase fate di bessoi, mangjative che no cori ator di bant prin di rivâ su la taule, aghe par ducj.
O sin in debit ecologjc cu la tiere. O doprin cun plui velocitât di ce che la tiere e rive a rigenerâsi e di chel che e rive a meti vie e a digjerî i vanzums di ce che o butin vie tai scovaçons.
O varessin, se o fossin coscienziôs, di mudâ compuartaments e costumancis intal produsi e intal doprâ. O vin di doprâ la nestre capacitât di inventâ, di usâsi al gnûf, di rispuindi a gnûfs modei di vite. O vin di tacâ dal movisi e dal costruî lis abitazions, di cemût che o tignin di cont l'ambient. Di dut chest al vignarà bon il nestri avignì.
scritto da furlan il domenica, 27 gennaio 2008,18:21
A la stazion di Topolò, Postaja Topolove daûr la toponomastiche slovene, si po rivâ par ferovie. La ferovie ven su pe val dal Nadison e rive in curt a la stazion che no je nome une stazion ma e je ancje une librarie.
Achì rivin studiôs di dut il mont che cjatin l'ambient just pai lôr incuintris e pai lôr studiis.
Stazion Topolò al è un puest stramp se lant ator pal bosc si puedin cjatâ cjampanots di cjavre di tirâ cuntune mantie e cjampanis a tubui su par un len, cjadreons dismenteâts e une tastiere metude di traviers dal troi, une mostre di muscli sot veri e la strade plui drete pal Polo Nord, par Berlin, Mosca o New York.
Trê cjâfs di cjaval e un om che al pagaie tes fueis, e une bancje fate di fiers che van adalt e une arpe tal mieç dal bosc.
Al è un puest cuntun alc di magjic. Un puest dal spirt. Che se tu domandis a un ch'al passe alc su Stazion Topolò, ti cjale, al sofle, al sdrondene il cjâf e s'in va.
E no jerin bessôi, a 'ndi jere ancje altris ator par chei trois. No jerin nome nô. No vevi bevût nie di fuart.
scritto da furlan il mercoledì, 05 dicembre 2007,18:33
No plui agricul, no a une gnove cualitât di ospitalitât, artigjanât, piçule industrie cualificade. No, une gnove idee. Il Friûl al è plen di centris comerciâi, epûr a Remanzâs a stan par fânt 'nt un altri. Su dutis lis stradis jessint di Udin si pues cjatâ di ogni. E pecjât che il Friûl a 'ndi à za tante grande distribuzion, e a 'ndi è proviodude (Poçui e Udin). Il marcjât de robe alimentâr al è sglonf e passût, chel de robe no alimentâr al è il cjamp di bataie dai prossims agns, la int e je chê e bêçs di spindi no 'ndi è, e, no ultin, doprâ il teritori morbit cence remission e je une sielte cence un tornâ.
“Parcè tante int e varès di passâ par Remanzâs cence fermâsi a spindi i bêçs che van a lassâ a Pradaman o su pe Tresemane?” Cussì a àn pensât i promotôrs dal gnûf centri comerciâl di Remanzâs. “I pensin nô!”, àn dite, “us le din ancje chê, o sistemin la viabilitât, tarondis e strade gnove, clâfs in man!”.
Il centri comerciâl al proviôt 4000 mq pe robe alimentâr e 13000 par chê altre. Dulà vignaressial chest gnûf centri? Denant, miôr, a nord dal Buonacquisto, dal stradon di Salt fintremai a la jentrade di Remanzâs.
scritto da furlan il mercoledì, 28 novembre 2007,13:23
O ai vût dai amîs di www.assiemeperiltagliamento.org une propueste di no podê rifudâ (si sa, a pain ben!)
Vuelin sburtâ la lôr iniziative di un filmât di informazion su "you tube": http://it.youtube.com/watch?v=xWjBFkxtauo
Il video si cjate ancje scrivint “illy pineta”
intal cjamp “search” (o “cîr”) de pagjine principâl di youtube (che salte fûr di bessole)
1) volarèssin pandi plui pussibil il filmât fasintlu viodi sul sît di youtube;
2) dut chest par rivâ tra i prins filmâts tal cjamp des notiziis;
3) par gjavâ la maschere a la distruzion dal ambient puartade indenant dal guviêr di Illy;
Votâit il filmât Votâit il filmât Votâit il filmât Votâit il filmât
Graziis par vê sc
oltât il comitât, pe nature tabiade e pe libertât di informazion
scritto da furlan il sabato, 03 novembre 2007,13:49
Se o lais bande Cividât, passât Muimans, o podês viodi un gnûf sbancjâment. A nord de strade e je za une zone industriâl, parcè ruvinâ ancje la campagne a sud bande Premariâs? A mancul che ruvinassin il za ruvinât!
Il Friûl al à des risorsis che no son nome culturâls o ambientâls. A deventaran in curt economichis. Il biel viodi, l'aiar net, a saran bogns no nome par cui che al è a stâ ma ancje par cui che a àn voie di vignî a viodi. Di plui. Podarès jessi sburtât ancje un che al ven a fâ robis ad alt valôr zontât. Un che al lavore cul computer, aromai che al sedi a Londre o a Cividât al è compagn. Se a Londre al è grîs, frêt, ploie, brut di viodi, ce fâ a stâ là? Se chi di nô si mangje e si bêf ben, al è un biel viodi, int ospitâle e vivarose, podaressin vignî nome pe bielece dal puest.
Invezit nô ce stino fasint? O jemplin dutis lis perifariis di bussulots di capanons, bandons, scjatis artesanâls, industriâls o comerciâls. Dutis cuntune robe in comun: jessi brutis. No crodês? Lait a viodi bande la tresemane, e prest in dutis lis altris bandis jessint di Udin.
Che no sedi pussibil fâ su capanons biei?
scritto da furlan il giovedì, 18 ottobre 2007,19:28
Tai agns la Tor, flumere a est di Udin, e je stade il scovaçon di Udin. E à insiorât i variis Danelutto, Midolini, Luci, siôrs de scovacis. Tra Pradaman e Paulêt i scovaçons no si contin.
Dut parcè cuant che si à tacât a vê refudonssi à butât dulà che no si coltave e daspò la che si gjavave glerie si è jemplât di scovacis.
Il pinsîir di riciclâ di plui e di cjatâ puescj mancul dongje a lis aghis al fâs fadie a jentrâ tal cjâf dai furlans.
Cumò l' Udinês al èscjafoiât des scovacis. Tant merit al va a Strassolt e al so guvier provinciâl.
Une des solitis ditis e vûl vierzi une gnove discjarie a Beivars, tant par gambiâ, su la Tor. Tant par gambiâ e je une buse di jemplâ. Samee che dutis lis busis a si scugni fâlis deventâ scovaçodromos.
Udin e à pene dite di no. Paulêt ni. Remanzâs si. Di cualchi bande lis scovacis a àn di lâ. I amerecans la clamin NIMBY, ven a stâi, no tal gno curtîl. Ma in chel pene plui in là, chel dal gno vicin.
scritto da furlan il domenica, 30 settembre 2007,22:49
Domenie mieze di lavôr e mieze di relax.
O ai fat un toc de Ippovie, di Branc a Are, vie pal Cormôr. Uune volte tant cun aghe che al samee un flum.
Beh, no crodevi ma al jere plen di int. A pît, di corse in bici di spassegjo e di corse, chei figos vistûts di marzians e chei cui fruts, carocele di corse, int cui cjans.
Cjavai nuie, une ippovie ma nancje un cjaval.
Us consei di viodi www.vallecormor.com
"Valle Nord del Cormor, una complessa sequenza di interventi di risanamento e restauro ambientali volti alla riqualificazione del paesaggio culturale rurale, adottata da sette comuni rivieraschi già a partire dal 2001 e realizzati dal Comune di Tavagnacco"
Cussì asi dismentee un poc i fastidiis di vie pe setemane e si cjarie la suste.
scritto da furlan il sabato, 15 settembre 2007,12:07
O ai stât une sere a Poçui a la cunvigne di Pierluigi Di Piazza su "Dulà cjatâ la fuarce pal futûr".
Un pôc no sopuarti plui i discôrs plui luncs di un tant, un pôc al mancjave l'aiar, o ai patît in chel auditorium.
o ai scoltât la relazion dal antropolic G.P. Gri che al à fate une relazion dute sul donâ.
Par lui il futûr al è tal mudâ dut su une logjiche dal donâ. Al à tra l'altri dite che il furlan, lenghe, al è stât salvât dai contadins e no dai citadins e che la detule che e spieghe ce che lui al vûl dî e je "ancje i cops a si dan la aghe l'un cun chel altri".
Une altre relazion di une femine colombiane, Debora Elena Barros Fince, che cjacarave intun biel inglês, avocat che si spint a pro dai popui indigjeni no nome dal so paîs.Une femine un grum grintose che e scombat cuintri lis multinazionai che vuelin brevetâ il rîs, principâl mangjâ de sô int.
Jê à dit clarementri che fâ solidarietât cui popui come il so par no siôrs al vûl dî nome doprâ di mancul. Doprâ mancul aghe, strassâ mancul energje, doprâ mancul la machine. Parcè che mantignî il nestri livel alt di vite al oblee a tignî puars i popui come lôr.
Sarà vere?
