Il gnûf numar de Patrie dal Friûl
E je jessude Patrie, il gnûf numar de Patrie dal Friûl par un Friûl plui furlan. E je ancje une interviste fate a mi dal Dree. Il numar al è seriot e la mê robute e cirive di jessi lizere. O tachi un toc. Pal rest lait a leile sul gjornâl e se no lu vês fat, abonaisi!
Il to al è il prin vêr blog par furlan. Di fat al è une sorte di «diari personâl», la definizion comun che si da pal «blog». Cemût âstu tacât? No sai se al è il prin vêr blog, sigûr al conte alc di me. O ai tacât stiçât de mê passion pal furlan. Mi soi dit: - In chel mâr grant, parcè no tacâ ancje jo? Po volevi capî se al è chel grant divertiment che al samee. Cussì o messedi riflessions e coments su la atualitât cun robis che o viôt, spetacui o piçui fats di vite di ogni dì. E o cîr cui “post “di jessi inzornât.
Tu tu sês ancje scritôr, su di ce robis lavoristu? Voi daûr dal moment, o ai tacât dal 95 cuntun zornalut dal paîs a trascrivi ce che al butave ju a man par furlan un gno amì che nol saveve nancje ce che al jere un ordenadôr. O ai fate une interviste a un vicin di cjase su lis storiis dal paîs, soredut contant la sô vicende partigjane. O dopri i concors leterariis come sburts par gjavâmi la tedie e par regolâ i timps. La miôr sodisfazion e je stade un premi a Glemone: alì o contavi di doi furlans che si son cjatâts sot Vignesie te bataie di Patràs; metût in recite inte sagre dal paîs.
Ce ti aial dât un an di rêt? Dal sigûr une gnove maniere di jentrâ in relazion cun int foreste, e il plasê di tornâ a cjase e di viodi che a cualchidun i è plasût ce che o ai “postât”. O ai tacât cul cirì ce che al jere di furlan ator: pôc. Po leint Il Furlanist o ai pensât che alc o podevi fâlu, ma come un cualsisei Brâf Furlan, nie di plui. Mi à dât une costance e une scriture plui svelte, provant a rispietâ il furlan scrit, cul jutori dal coretôr. O ai la ocasion di scrivi e di fâmi lei cence tamês.
Consearessistu di vierzi un blog in marilenghe? O mi maravei che tancj che fasin i côrs di lenghe no lu fasin. Cuntun furlan scrit di principiants si po za fâlu. Bisugne tignilu vîf, e lâ a cjatâ cui che ti comente. Al jude a fâ esercizi e a cjatâ un tic di ironie. Fâsi lei nol è facil. E nol à di deventâ un sacrifici. No si à di deventâ sclâfs dal contadôr: un me amì lu à gjavât, jo dal “template” che o dopri no ai tocjât nuie, ancje parcè che no sarès bon.
