Brâf Furlan

O cjali di fûr la campagne dulinvie. Si sint che il timp, lis cjasis, i lens, a son di une nature sigure e al stes timp balarine. Cheste nestre tiere, tra gleriis e aghis al è un di chei puescj là che no je polse, tu âs di misurâti cu la grandece dal Friûl. I contadins cuiets si passin dal bon an passât, intes frascjis ti cjalin cu lis musis di piere e di aiar sigûrs di jessi vuê tra chei che vivin ben in chest mont e no plui tra i strissine miserie di un timp. E vain distès.

Si sta al cjalt daur des tendinis a cjalâ la fumate che si jeve, dongje une stue che sclopete lens di morâr. Fûr dome cualchi sfilic, bars di tiere remenade di fresc e fueis che svoletin. Morârs cjonçâts cul cjâf grant a sburtâ in aiar deduts di ramacis a sgorneâ tal frêt. Jentre int bêf un tai, scolte, dîs la sô e torne a lâ, lassant il puest vueit par pôc  dongje dal banc.
La ustiere taronde, cuntune maiute un tic masse piçule, un golfin lidût, rosset fuart e rincjins a pendul, rît ai musets picjâts, ten bot al discors e cjantuce contente.