Brâf Furlan

O fâs un pôcs ducj i mistîrs di cjase. No tocj ni scove ni fiâr di sopressâ. O tachi la lavadorie cence dams, o cuasi. O met a suiâ cuasi ogni dì. O tiri dentri come che vûl la femine, robe cun robe cence striçâle. O pii la stue e met a puest i lens. O viôt des dôs machinis, o comedi lis bicicletis.

Lis scovacis, dal dividi a strucjâlis, cuissà parcè, a son dutis mês. Ancje dutis lis lampadinis a son par me. O bat e o torni a bati di lassâ impiadis chês al neon e di studâ chês a vecjo vie, cence sodisfazion. Isal cussì dificil? O tiri su il jet, spes. O cjapi su par tiere e di polvar dôs voltis ad an. O lavi i plats uns dôs trê voltis a setemane. O meni e o cjol i fruts ogni dì chi e là. O viôt dai lôr compits e o i moli un franc.

O fâs la spese e o met su di mangjâ e no nome la pignate de aghe pe paste. O fâs cualchi regalut, piçul, ma mi visi dai compleans. O soi di pocjis spesis par me. O voi a vore lis mês oris. O cjali il computer un dôs orutis e plui in dì ma ancje par lavôr. Viôt de marute e dal paîs, o meni ator il cjan, a la sô stagjon remeni l'ort, cumò no, lu lassi cuiet.

Ce i vuelial par dâmi un cualchi goloseç? No soi farine di fâ ostiis, ma un slicugniç mal meretio?