Brâf Furlan

O sai che Turo al veve ideis socialistis, compagn di dute la sô famee dal rest. Chei a jerin agns dulà che lis ideis a sglonfavin il pet e si steve pôc par passâ de bande dal tuart.

Lise femine tant di glesie, par pôre o par ignorance i brusave la stampe che jê e diseve soversive e che lui al clamave "la mê scuele". Turo i diseve:

-   Dulà isal l’Avanti?

-   Ce ti interessial di lei tant chês robatis?

-   No tu capissis nuie, bisugne lei par capî, e se tu imparassis a lei tu capiressis ancje tu che al è impuartant lei!

-   Jo o sai che il lei a no mi puarte dongje di gustâ!

-   E invecit se tu leiessis il Avanti, tu varessis capît che no ti la contin juste sul fassisim e su la vuere.

-   Jo o sai che cumò o ai di lâ a molzi e che il to Avanti mi è coventât par impiâ il fûc.

Lise no saveve lei, jê i rispuindeve che lui al jere masse vecjo pe vuere e che no lu varessin riclamât. E Turo secjât:

- Se e fos une robe juste o larès, ma lôr a pensin ai lôr interès e i confins de patrie no centrin nuie!

Lise vaìve parsot, par no dâi sodisfazion, e cidine e pensave:

-   Cui isal stât a straviâi il cjâf, forsit in France,  di chê volte ch'al è tornât nol è plui chel!