Brâf Furlan

Un articulut dai Wu Ming. Al si cjate ca (si clame New italian epic). Dut ce che al côr ator di lôr a mi intrighe un grum. O ai let "Manituana" e "54" e alc altri tipo Giap, ma al è il lôr progjet di une inteletualitât provocatorie, anarchice e iperboliche che al à grande atrazion.
Chel che o volevi meti in mostre al è il gnûf document burît fûr. O podeis lâ a leilu, al merete.
Ce che al dîs?
In struc, che la narative italiane si è tornade a meti in moto.

Alc al sta sucedint. Il fat plui clamorôs al è il Gomorra si Saviano cheal è un dai libris plui famôs dal mont dal an passât. Ma samme che si inacuarzin plui dal di fûr, dal forest che no di chenti. In Americhe lu tachin a clamâ "Gnove narazion epiche".Epic tal sens di corâl, narazion a la larghie, che e met in zûc la memorie e il futûr.
No si cjacare plui di contaminazion ma  si sta in bande, plui indenant, dal gjenar di sburte e si scjavace inaltrò e plui in là. E je une maniere di contâ cjalde, cuntun font etic.
Tal mont dal contâ al sta nassint alc, il dificil al è inacuargisi.

Durmivi, vuê, in machine tor trê, cjalt e il tran tran de autostrade che al niçule. Cun cualchi centenâr di chilometrots su la gobe, e vuidave la femine e jo mi insumiavi, cu la bave sul ôr de bocje in bande,  sudant, pierdût.
No sint plui chel rumôr di ruedis e motôr, chel sdrondenament regolâr. Mi scjassi chel tichinin e o mi inacuarç di alc che nol mi cuadre: - Ce sucedial?
- O sin fêrs di mieze ore. 
- Cemût fêrs?
- No si môf nie.
- E chei di che rie làju parcè corino?
E jere une altre rie che si moveve e dulà che o jerin nô nie, trê camionons, ongjarês e un cec incjastrâts un in chel altri e nô tal mieç e nissun di chei che al podès movisi.
O ai scugnût fermâ la corse de rie buine, fâ manovrâ chei fêrs e disgredeâ il dut.
E chest al è nuie. Tant che o mi devi di fâ chei fermâts a rosein. Chei che prin a corevin, fêrs ancje lôr, a si incazin. Smonte une siore, ocjai neris e tirade fuart, che mi dîs cemût mi permetio jo, che jê e je ferme, e prin e coreve, dut par colpe me, e jê e à fruts piçui e che jo o stoi fermant ducj, se no soi deventât mat.
In chel un camionaro blestemant in ugro finic al dismonte e mi berle te sô lenghe. Jo tal mieç des machinis, si visaiso chel dal Cynar, Calindri, compagn di lui, cun ducj fêrs che mi cjalin e doi che mi berlin te orele.
In chel denant la file si môf, si slungje la buse o fâs moto a la femine di movisi par intrufulâsi e o lassi il camionist ugro finic a spiegâsi a motos cu la femine in tîr. Lôr tal mieç dal asfalt e jo che o monti al svual come Tex sul cjaval.
Che a sedin ancjemò là?

Di agns in ca o vevin vudis lis provis di cemût la tiere si steve steve inviant viers un tamesâ cence remission ducj i ecosistemis naturâi. La sene che o stevin par vivi tal 2050 e sarà che di un doprâ dal dopli plui alt di ce che si po sopuartâ.
Come oms e feminis o vin di domandâsi se o vin a cûr la nestre tiere. Ce che o podin fâ, parcè no lu stin fasint.

A son trê lis robis di tignî cont: energjie, mangjative e aghe. Energje de cjase fate di bessoi, mangjative che no cori ator di bant prin di rivâ su la taule, aghe par ducj.

O sin in debit ecologjc cu la tiere. O doprin cun plui velocitât di ce che la tiere e rive a rigenerâsi e di chel che e rive a meti vie e a digjerî i vanzums di ce che o butin vie tai scovaçons.

O varessin, se o fossin coscienziôs, di mudâ compuartaments e costumancis intal produsi e intal doprâ.  O vin di doprâ la nestre capacitât di inventâ, di usâsi al gnûf,  di rispuindi a gnûfs modei di vite. O vin di tacâ dal movisi e dal costruî lis abitazions, di cemût che o tignin di cont l'ambient. Di dut chest al vignarà bon il nestri avignì.

E jere une sere che o vevi di lâ a sintî sunâ mê fie cu la sô bande a Madrîs di Feagne. Te osterie "La brente" (lait, ospitalitât cjalde e presut di lusso) o lampi il gjornâl o lei dai FLK a palaç Pico a Feagne. Orco mondo, o mi dîs, ce fasio achì dongje, o voi. O cjapi su e cuatri e cuatri vot o soi là. Orco di bacco si paie, vot euros, po ben anin.

A tachin freduts, a sintin chei cuarante di ca e la sale stente a scjaldâsi. Formazion eletroacustiche cence batarie e tastieris e cu la percussion che e fâs ce che e po. La Cristina e fâs dut il so e je la zovine Deborah Cutugno, ce orele, compliments, cu la seconde vôs, a tignile su fin che la parone no cjape su la serade. Daniele Flaiban a la chitare acustiche amplificade e mandulin al dà chel sburt vivarôs e zovevul. Chescj doi zovins a dan un di pluidi frescje vitalitât al grup che, bisugne dîlu al è tegnût su dal bas melodic, liric e batecul di Flavio.

Jo o larès a sintîju ancje a cja dal diaul. Ma o volarès fâ une domande. Rivât, come che o soi, a cincuante concierts, isal un bonus, un santut, un autografi de mitiche Mauro?

I ultins tocs a funzionin miôr, chei vecjos Em-ma, ma ancje l'ultin bis la "Travariza" di "une file, une e daspe..." funzione, orpo se funzione.
No sai se e je la musiche o cemût che le cjante ma "Stabat pater" e ven fûr plui che benon e al è un gran toc. "Se il nero" al è plui facil, al cjape subit. Ma jo di vecjo fan o ven scjaldât fin te panze, e o mi pas, cuant che o sint a tacâ "Vegle di lune"...

Cuant che si è malâts la part dal dâsi coragjo e je tant impuartante tant di chê de terapie cu lis medisinis.  Alis medisinis pe plui part a pensin i miedis. Jo o mi fidi de diagnosi simpri, dal scrupulâ massime se je cun alc che no sai, cualchi gnove machine che samee il non di une caramele, tic tac pet pot.

A proposit, un me amì dopo che al veve spietât mês par fâ une tac o simil, chê che si à di lâ dentri un siluro e stâ a tu per tu cu la machine che ti si siere la visuâl par une mieze ore, cuant che al à viodût là che al varès vût di stâ e par trop timp, al à dite: - Jo alì dentri, par mieze ore, no grazie!
E dret a si è inviât cu la infermiere che i coreve daur.

Pe cure o fâs par solit mancul di ce che mi disin o intune altre maniere.

Cuant che la malatie no je di passaç, come une polmonite o un braç rot, alore e je croniche. Cuant che tu sâs che chê malatie tu le varâs par simpri, alore tu âs di fâti il voli, dâti une reson, une spacadine e vie indenant. Guai cussì no.

Cence dubi la part psicologjiche e je che plui ingredeade. Il savê che la tô imortalitât e je finide al è un brut colp. Prin o dopo si scugnive rindisi cont dal propri jessi finît. Ma tocjâlu cun man e je une biele scuvierte.

Al è il dâsi coragjo e tornâ a inviâsi e l’imparâ a convivi cuntun alc che nol è plui chel di prin e, che si sa, nol tornarà chel.Tancj a le cjapin a la lizere e magari si strapacin, tancj a si avilissin e a riscjin di butâle in depression. E cussì la situazion e devente plui penze. Par chel al è ancje un cualchi jutori di un psicolic.

O 'ndi ai cognossude une (une biele fantate) che e je specializade a stâ dongje a di chei che àn une lesion fuarte al fîl de schene. Jo no sai cemût che e fâs, ma no mi le viôt lizere la cuestion tal spiegâ a un che fin prin dal incident al jere un bulo  che di lì indenant al sarà dutun cuntune carocele.

O cjapi da "Il Furlanist" e o met in struc ancje achì di me parcè che cheste analisi dal vôt de Regjon  mi samee un grum interessante. Al è firmât Zeno Pessoa, un nick gnûf che al plate une identitât une vore curiose.

Furlans e meridionâi a àn un pont in comun. A votin i lôr nemîs. Cuant che un popul al fâs chest, a si scugne domandâsi se al è pardabon un popul bon di valutâ il so distin o nol è invezit une schirie di individualitâts che a repliche a nivel locâl, cence nissun distingui, il vôt nazionâl. Une robe che achì di noaltris e je capitade di sigûr; lu disin ancje chei che àn vint, ven a stâi Menia (cul gjubot des frecis tricolôr). Ma nol è dut achì, sigûr che no. O sarin sotans di Milan, per me al è talmentri clâr che gambiâ un centralisim par un altri, e par zonte sussidiari, al è un pessim afâr.Cjalant i dâts disagregâts par comun (robe che consei di fâ) alc al ven fûr. Ven a stâi che e je stade soredut la provincie di PN che no viôt la ore di lâ cun chê di Trevîs (la camere di cumierç l'an passat a voleve fondisi cun che di trevis?) a mandâ un segnâl.

A part un pâr di comuns, di fat il PDL là jù al passe pardut cun percentuâls tor al 60% cun chestis spicis chi: Brugnera 76,74%, Prata 75,86%, Pasian di Pordenon 71,43%.

In provincie di Udin invezit la situazion e je plui variade e risultâts dal gjenar a no 'ndi è nancje a Manzan o Nimis (che pûr rivin al 67%). Ciert, Tondo al à vinçût ancje te nestre provincie, ma no in maniere cussì largje. La basse e la mont (pûr vint Tondo là sù il so "Headquarter") àn votât di fat in maniere difarente. Il Friûl di mieç (che cualchidun magari al pense che al sedi "la scune de lenghe") invezit, votant come che al à votât, al à mandât in consei chei che pensin e disin che il furlan al è biel se difindût des fameis. E duncje nie gjornâi, no tv, no scuele. No media ma Menia duncje. Benon. Baste savêlu.

Il popul dai outlet, des "Porsche cayenne" e dai mobii vendûts a neri, simpri pront a vaî miserie e a suiâsi lis lagrimis cuntun façoletut tirat fûr di une borse di Prada, di chestis storiis achì a si sbat. E no covente lâ a PN par cjatâ la int cul Cayenne che e vai miserie! La plui part di chei lì, di cierts tamês a no i free nuie...che e sedin di PN, di UD o di Cividât; ciert al è indubitabil che l'ovest de province di PN al à un redit elevât e al vote cemût che si è viodut. Il rest de int invezit, mi pâr, e à pal cjâf ben altris robis e cu la crisi economiche che ven indenant simpri plui ahimè a 'ndi varà.

Ve duncje che in chest cuadri achì, pûr cui sôi limits (Tav, centris comerciai e v.i.), che o ai pôre che no si gjavarìn vie nancje cun cheste pene elete, la zonte Illy e jere une anomalie. Une anomalie di podè provâ ancjemò a doprâ a nestri vantaç.
La realpoltik di vuê a no à spazis par nô, vin di vuadagnâiu. O sarìn strategjics o tantis des nestris pocjis concuistis a saran scanceladis. Pal moment o vin fat mieç pas indevant e doi indaûr. No je une novitât assolude però; a fâsi mâl di bessôi noaltris furlans, si sa, a voltis o sin dai vêrs fenomens.

Zeno Pessoa

"Adess me racumandi, laurà": di ca indenant a si cjacararà lombart ancje in Friûl, tant a lu si sa, al è Bossi cui che al comande. RadioPadania e invide a lâ a vore, par paiâ mancul tassis, cui no i sta, e vê sigurece che, par lôr, e vûl dî cjapassile cui imigrâts, lu si sa, ducj delincuents.

Il tierç partît de Italie, la Leghe, trê voltis chel di prin, al smicje di meti fen sot dal toblât. No son alì migo dibant!  A laran ae casse, a àn vinçût lôr, netisie, vie i sflacjons. Vie des balis chei furlaniscj che no si sa cun cui che stan: a van mo ca, mo là, daur di ce che ur comude.
Il podê de Leghe, cumò che al è ancje partît di lavoradôrs, e no nome dal popul de partide IVA (e de evasion) al è di sburtâ pai lôr interès, nol sarà plui il partût de scocole voi Guerra e dal conciliadôr Violino, cumò muse dure e barete fracade...

“O feveli furlan - al dîs Tondo - e lu cjacari cui mei colaboradôrs. No crôt che il probleme al sedi inventâ une burocrazie furlane - al zonte par talian - par vê dut voltât par furlan, ma doprâ la maniere furlane par vê mancul int in file e une aministrazion che e funzioni.” Cussì l'ustîr Taront al cjacare siervint tais te sô buteghe. Pocjiis ideis e biel lant daur ai plui coiars, chei che a fasin la opinion in dì di vuê.

Metint denant i interès di cualchidun a chei di ducj, la burocrazie a la identitât.

Ce dî di chei altris, di chei che a àn pierdût. Si po jessi brâfs tal comunicâ ma alc a àn sbaliât tal viodi la situazion. La bisugne di sigurece e bêçs, il lâ mancul de solidarietât e dal ben volê al prossim, e il nâs, sigûr il bon nâs,   a àn puartât a lâ tal braç di cui che al olsave a dî che chês de identitât, de solidarietât, dal ben vivi insieme, dal fâ puest a cui che nol rive, dut chest al è nuie.
Grande responsabilitât le àn vude i politics che no àn capît che la int e je strache, stufe e che no vûl tancj discors, ma usade come che a je, a la publicitât, e vûl rispuestutis facilis e sempliçutis.
O crôt che ducj, vincents e trombâts, a scugnin pensâ ben e àn di fâsi cualchi domandute. Dal tipo, la int ce fastidiis ae? Tropis rispuestis podìno dâ? Ur dino sflocjis o soluzions?

A me fie o ai dit. - Tu âs la fortune di no vê di spietâ cuissà trop, come che o ai fat jo, par viodi vinci cui che tu âs votât!

Al à vinçût, pe tierce volte, il vecjo tarocât al sarà al guvier dal paîs. Onôr ai pierdints, compliments a cui che al vinç, che si comodi, lui e la sô compagnie.

Une patafade e je rivade. No si po dineâlu ni onorevul platâle. Cumò o soi daur a spietâ chê altre. Une patafade che e stade plui une sdrangolade, di chês che ti fasin lâ vie gobo. Par cualchi zornade o larai vie  riduçant di ce tant mone che o soi, di crodi di jessi miôr dai mei paisans. No soi miôr, no soi piês, o soi un di lôr. Mi vergogni par me e par lôr.

No nome une patafade, une disledrosade fin tai budiei. No je in Italie la reson di viodi il mont dal bas, si vûl ducj jessi plui siôrs, plui biei, a ducj i coscj, ancje chel di scliçâ cui pîts il cjâf di chei che a stan sot. Il Friûl al è daur di Venit e Lombardie la regjon plui leghiste. Alore indenant cun Suv e capanons, asfalt e borie, svilup e competizion, evasion e lamentazions cuintri Stât, sarà biel condonâ e sbassâ lis tassis. Cence freâsi di cui che nol rive a stâ daur a la corse. Il biel al è daur dal cjanton, scomencin a freâsi lis mans.

Jo o jentri intune sorte di letargjie.
Opur vino ancjemò di dismovisi, isal migo un sium?