Brâf Furlan

Ce isal un blog? Une serade a sant Denêl, une cunvigne inmaneade di Leggermente cun setante di lôr a sintî dulà che al zire il mont di internet. Un diari in rê, un fenomen tacât in Americhe che in dîs agns si è slargjât a dut il mont. In Italie al samee che a sedin uns 350.000, in Friûl no sai.  Di ce che o ai vedût i blogarins a menin là che ognun al vûl lâ.
I blogarins che jerin sintâts daur dal bancon a jerin chei ca:

E jere une Giulia sbilfarine che tignive su la serade   www.saitenereunsegreto.com; la Dania Malafemmena che e pandeve ironie erotiche e mostrave, orco se mostrave, ma nome sul blog,  www.dottoressadania.it; un Sergio Maistrello, savint anzi che no, che a 'ndi saveve une di plui di ducj, www.sergiomaistrello.it; une Margherita Ferrari  che e jere restade, e contave dal so mont vicentin   www.margheritaferrari.com; un Daniele che samnetave cui pachetuts di spagnolets e bulo a smanetâ cul ordenadôr, http://pro-fumo.splinder.com; e il nestri Dree furlan, http://ilfurlanist.splinder.com, che al poiave une pocje di sane e nostrane furlanetât.

Di ce che o ai sintût e mancje une critiche al mont dai blogarins e di internet. Al è stât presentât come un sisteme cence fai e cence ponts scûrs.  O sarai moralist, ma  mi spieti di savê se al è il ben e il mâl e dulà che son. A son ancje porcariis ator che a puedin fâ dams. Veso mai viodût chei blog esibizioniscj, di anoressichis, di stupiduts e di int che no à nuie ce fâ, e al meretarès cjacarât intune cunvigne. Di bon pari di fameeun pôc mi fâs fastidiâ. Nol è vonde no lei, a son alì, a àn un pês e no si po fâ finte che no sedin. Un voli un tic plui complet e critic e mancul esibizion a no vuastarèssin.

Si leve a messe ognun te proprie glesie, la domenie. Si leve cul vistît bon, chel sborfinât mîl voltis. Si leve ducj o cuasi. Chei che no levin si cjalavin di stuart. Une volte ad an, ducj a si partive par un cualchi vôt di pelegrins a une cualchi madone. Par tancj e je stade chê la uniche gjite te vite.  O si leve, cualchidun, par une gracie grande dal sant, sant Antoni, chel dal purcit torzeon, a Padue.
Jo o soi stât vuê a fâ il pelegrin li de madone svedese imobiliade de Ikea.

 E no jerin bessôi, fameis fameutis, zovins che discorevin di meti su cjase. O ai cjalât cun gust une cubie di omenuts cul metri in man e disen di cjase a discori trops bussulots meti parsore de vitrine.
Isal mai un rît coletîf par parâ vie i spirts triscj e la vualme o nome un puar rît dal consumisim?
Piçulis atenzions pai fruts tai bagns e tal gustâ, mangjâ biologjic a pôc e grandis furbariis par fâti cjoli di ancje cence che tu vedis vude par nuie la intenzion di comprâ.

Cul lâ a cjoli al Ikea a si sintisi ducj balarins, come i lôr prodots (ma a chei presits ce si puedial pretindi? E cui tacuins che o vin, che si tocjin i coreans, ce puedino cjoli?). Ma un mobil dai lôr, a lu si sa, nol è par simpri. Al va ben par chei tocuts di vite tra un stâ e un lâ, cuant che e rive une gnove situazion, o si piert chê vecje, o cuant si à la braure di parê bon ma no lu si po pretindi daûr i bêçs.

Il suces di chei mobii al è che a durin pôc, ma a son biei e legris e tu i cjolis e tu i butis vulintîr.
Scjaps di singui a lu san ben, cuant che a molin la cjase a lassin ancje i mobii che tant a nol vâl la pene nenâju vie che al coste masse.

Serade speciâl al me paisut, in glesie parcè che no 'ndi è altri di spazis publics. Biele rapresentazion, un musical in furlan, religjôs ma no dome, disarès moderni, cun cuartet plui organ e percussions. Côr e soliscj. O ai presentât ju cul cûr fin tal cuel, ma no jere angjine, nome emozion pe mê prime volte di gnûf su la onde, po si son distudadis lis lûs e mi è scjampade une lagrimute, di emozion, par veile fate a puartâle fûr.
 Musical dal titul "Cui ciriso?" di Silvano Buchini e il so "Emmaus ensamble". Biel e di viodi.

Da a la int plui di ce che si spiete. Cuant che tu disis ti vuei ben, no stâ a dîlu dibant. Cuant che tu disis, mi displâs, cjale tai voi chê persone. No stâ a ufindi e no stâ a judicâ chei altris par colpe dai lôr parincj. Fevele adasi, pense svelt. Se cualchidun al ti fâs une domande che no tu âs voie di rispuindi, domande: - Parcè vuelistu savêlu? Impensiti ben che il plui grant amôr e lis plui grandis sodisfazions a puartin ancje grancj pericui.

Cuant che tu pierdis, no stâ a pierdi la lezion che ti ven, visiti: - Rispiete te stes, chei altris e vêi sest par dut ce che tu fasis. No stâ a permeti che un piçul intric al ruvini une biele amicizie. Cuant che tu ti rindis cont di vê fat une falope mendile subite. Rît cuant che tu rispuindis al telefon, cui che ti stâ clamant a si inacuarzarà de vôs. Usiti a lei jenfri lis riis. Visiti che alis voltis no rivâ a dut ce che tu vuelis al è un colp di buine sorte.

 

Soi dacuardi cul Dree (post prime di chest), come al solit al à reson. Dut câs o voi indenant cu la riflession di Siegel Lee, autôr di "Against the machine".

Cui che al scrîf un blog - al dîs - al met in mostre e in vendite il so privât. Al à pôc a ce fâ cu la libertât che e je leade a la veretât, e su internet  - seont lui-  di veretât a 'ndi è pocje. Su internet si vûl jessi come chei altris, il biel dal zûc al è platâsi e mostrâsi miôr di ce che si è. Il fat di jessi platât daur di un nick name ti permet di no vê inibizions. E ancjemò - simpri lant indenant cun Siegel, al dîs e mi cjape avonde che - su internet a no si invente nuie ma nome dut al si ricicle. Tancj blogarins no fasin altri che zontâ rumôr al rumôr di font fasint di dut un unic grant bacan.

Si  scrîf su internet cence control, lassantsi lâ a pinsîrs cence confront, cence une espression autentiche.
A sparissin lis diviersitât invezit che incressisi.

Il fat che nome internet no puarti lontan mi cjate dacuardi. Ma al è ancje vere che il confront al è di tantis bandis e lis opinions cence confront, tal dibatit, no àn spazi larc. Internet come l'ordenadôr che o stoi doprant cumò a son dai mieçs che mi coventin, ma no àn di deventâ la maniere di esprimisi come che a crodin tancj zovins. Se jo no ves une mê forme autonome di scrivi al di fûr dal blog, e une mê forme di leâmi e di dispeâmi, di cognossi e di discognossi, no varès nuie di meti in comun intal blog. O vuei dî che o pensi che, come tal me câs, internet al è nome un toc di ce che o buti fûr di me, e o conti sul fat che nol sedi nancje tant il miôr.

Finudis lis mangjadis di Pasche, par parâ ju il dut, o invii une riflession sul mont di internet che mi cjaparà uns doi trê post.

O vuei fâ une riflession, (cuntune peraulate une riflession epistemiologjiche),  su ce che si dopre par tignî vîf un blog e sul so significât come mieç. O cjapi l'ispirazion stiçât di un articul di Lee Siegel (Lee Siegel cuintri Internet; interviste al Wall Street Journal: Gnûf atac al web e a lis sôs manifestazions) che al à pene scrit  "Against the machine". Chest siôr al conte che secont lui Internet e je masse preseade tant che nissun al olse criticâle. Internet e je la prime place sociâl che puarte l'individui a jessi plui impuartant de societât che al à dongje, lui le clame la  "Me generation", la gjenerazion voltade al se.  Al spieghe: - Cuant che tu sês su internet, tu fasis, al stes timp, plui robis: tu mandis messagjins, tu scoltis la radio, tu scrivis alc, tu âs alc altri par consultazion, tu discjariis une robute, tu spietis une e mail, tu rugnis cuintri il spam, tu prenotis un libri, tu ciris su e bay la ciclette che ti covente, une cucade ai gjornâi e vie indenant.
Ven a stâi a tu ti usis a vivi intun ambient che al samee plen di int e tu ti sintis passût di relazions. Ma al è dut plen di fantasimis, e 'nt tu sês plui bon di fâ nuie, tu vâs daûr a ce che ti permet une machine, a ce che ti permet Bill Gates, a ce che ti vuelin proponi parcè che a cognossin i toi guscj, ai bêçs che tu spindis in tecnologjie e a trop che tu sês bon di doprâle.
Su internet - al va indenant il siôr Siegel - no son principiis umanistics, ma al è il trionf de societât dal cumierç dal egoisim, dal narcisism di ognun sierât tal so spazi virtuâl. Si va daûr al capitalisim: fâ plui bêçs che si po.
Il ultin sbroc dal capitalisim - par chest siôr Lee - al è ridusi la vite di ognun, la vite interiôr, in marcjanzie. E internet - al siere Siegel - al stâ rivant a fâlu.

Durmivi, tal mieç dal sium o ai sintude une man ferme, cjalcjâmi sul stomi, che al sedi il Cjalcjut spirt sbilfarin antîc? Une man a tirâmi pal braç e o mi soi dismot. O tal sium o ai vût un moment di salustri.
Il "nano ridens" al cjoleve l'Alitalia, Tondo al cjoleve la mense de Universitât di Udin par fâ il cogo e Cainero al meteve pal Zîr di Italie il partî e il rivâ di ogni tape a Udin. E Fontanin? Chel al jere sul Cjascjel di Udin daur a barufâ cul agnul parcè che nol mostrave Basandiele ma si ostinave a mostrâ, cul dêt pontât, Talmassons, paîs de Grillo.
Al jere un bielissim moment. Cecot al faseve yoga sul puiûl de Loge dal Comun cun Magda che lu clamave par fâi fâ i compits al frut. Honsell al calcolave l'algoritmi par fâ cori i tassì cence ingredeâsi cui bus e Illy al regalave cafè a ducj. Al jere alc altri che o vevi di cjalâ ma no savevi ben ce.
Lis parts dal aiar che o viodevi a jerin netis e claris, ma a jerin mîl ombrenis viertis, a jerin i Alpins che vevin un radun in place par fiestezâ il taiut plui grant dal Friûl. Lis fueis dai lens a jerin, cuintri soreli, trasparentis. Sot vôs, forsit, o fasei une critiche a Diu par no vê scoltât la supliche di dâmi salût, frice frescje e bêçs in sachete: lui al fasè finte di no scoltâ.
Il centri dal me pinsîr al jere dopli, tant che la mê part di bintar e faseve chel, chê altre part voleve che o deventàs sant e intun colp beât, siôr e biel. O durmivi, tal mieç dal sium a sunarin lis cjampanis: e jere Pasche, a sunavin glons inocents.
No ai di bevi cussì tant cuant che o mangji penç.
Buine Pasche a ducj cuancj!

A un zovin, deventant pari, i vignì une grande pôre e pierdintsi intun sium, tra lamps e tons, al cjape pôre e al vûl domandâ un consei. Al va di un strion a domandâi cemût fâ a deventâ un bon pari. Il strion i rispuint che lui nol à fîs e chei che al à cjatâts ju à ben che mangjâts. Chest lu scaturìs fûr dal sium e si svee sunât e spaventât.

Cul jutori de femine, che i voleve tant ben, al va a domandâ consei a un benandant, intun pais no tant lontan, ma nancje tant dongje. Rivât di chel om cence timp i disè: “Judimi, o ai grandis robis di fâ e un strion mi vûl mâl. O zuiavi fin îr e cumò o mi cjati pari cence savê cemût deventâlu. Ma o ai fat un sium, che no sai se al è vêr o no, dulà che chel brut strion al mi vûl butâ la vualme al frut. Disimi tu ce che o ai di fâ”.

Il zovin al volarès vê scrite une cjarte, par podê viodi cemût fâ, dulà che si insegnin i segrets de vite, e chei par tirâ su i fruts e dâi lôr la  savietât.

Il benandant lu cjale, cun calme, e i dîs che no, nol po scrivi une recipe. Il zovin al bat ancjemò.

- Tâs, no je chê la maniere juste! Chê o ti le mostri jo.

Lu mene vie, intun puest dulà che il zovin nol cognòs ni strade ni timp. Cjamine che ti cjamine, conte che ti conte, il zovin domande al benandant là che a stan lant e lui i rispuint : - O soi un Benandant migo dibant, e o sai dulà ben lâ.

Rivâts intune plane plene di cisis e morârs i dîs: - Cjale. Tu sês dentri un labirint. Tu tu varâs di saltâ fûr di bessôl. O sarai achì cun te, ti judarai a cjapâ la strade juste, se tu âs di bisugne. Ma no tu podarâs plui tornâ indaûr. Il troi plui curt al è fat di 144 pas, un di plui e une zornade di plui ca dentri, e se no tu rivis bessôl, o ti darai une man e une pidade tal cul.

O volevi scrivi de zornade di vuê ma o soi restât des primis provis di muarts in Tibet che si puedin cjatâ in rêt.
Lis autoritâts di Pechino a àn dite di no vê doprât sclopis cuintri i manifestants, ancje se tancj di lôr àn testemoneât il contrari. A contin che la capitâl  Lhasa e je sot dal coprifûc di doi dîs in ca.

A son lis primis imagjinis crudis di chei che a varessin di jessi i muarts tai scontris al monasteri di Kirti. A son fotos veramentri duris.

La pubblicazione e va viodude cun dut il sest e il bon cûr dal câs, ma a son une part de veretât che a no si po platâ. Se o vês stomi e dolôr di conividi cjalait ca.

La zornade di vuê le ai dediade a la lauree di me fradi che a 44 agns finalmentri al è rivât insom. Auguriis!

Viodude la Mostre intitulade 'La terra indagata. I pionieri della ricerca in Friuli', inmaneade tes salis di Vile Chiozza, dal ERSA, a Scodovacje di Çarvignan dal Friûl.

Te mostre a si po viodi cemût dai oms pal plui scognossûts dal dut a jerin, tal lôr timp, colegâts cu la France, cul Imperi Austriac e fintremai cul Gjapon. Il sburt de mostre e je la riunificazion di plui fonts di documentazion, une gurizane e asburgiche cun chê  taliane de metât dal votcent.

Si po viodi ancje cemût e je gambiade la maniere di vivi tes campagniis furlanis: de maniere tradizionâl che vignive di dulinvie i secui a une maniere plui moderne come imprescj e cognossincis e un tic ancje come benstâ. A son stâts oms tant che il chimic Luigi Chiozza che al jere amì e compagn di studiis cul ben plui famôs Luis Pasteur che propite a Vile Vicentine a àn metût a pont la maniere par coltâ i cavalîrs daspò une malatie che ju veve metûts a riscj.

Une zentile siore cjargnele, dal tabajâ marcjât, e spiegave ai pôcs a viodi. Biele, breve e un grum competent. Jo i domandavi par furlan e jê no à dite nancje une peraule in marilenghe.

Se a vuelin che i zovins a vadin a viodi une mostre oramai a si scugne meti un filmât, un zugut, un alc di podê tocjâ, zirâ sot sore. Se no la mostre e reste vueide.