Brâf Furlan

O ai cjatât cheste prejere scalembre di PPP par talian e le ai voltade, secont me e funzione distess, anzit forsite miôr, a part la presunzion di podê voltâ PPP in furlan standard. Chê no mi mancje.

"Pari nestri che tu sês intai cîi, jo no soi mai stât ridicul in dute la mê vite. O ai simpri vût tai voi un vêl di ironie.

Pari nestri che tu sês intai cîi: ve un to fi che, in tiere, al è pari... Al è par tiere, nol si difint plui... Se tu i domandis, al è pront a rispuinditi. Al è tabaiot. Come chei che àn pene vude une disgracie e a son usâts alis disgraciis. Di plui, al à di bisugne, lui, di fevelâti: tant ti cjacare ancje se no tu lu clamis. Ce tante buine educazion dibant!
No soi mai stât maleducât une volte te vite. O vevi il trat distacât dalis robis, e o savevi tasê. Par difindimi, dopo il mateç, o vevi il gno stâ cidin.

Pari nestri che tu sês intai cîi: o soi deventât pari, e il grîs dai lens sflorîts, aromai cence pome, il grîs de eclìs, pe la tô man, mi à simpri difindût. O fevelarai cun Te tant che une vecje, o un biât, un operari che al ven de campagne, rindût cuasi crot de cussience dai cuatri francs ch’al vuadagne e che al da subite a la femine, restant, lui, cence bêçs, tant che un frut, ancje cui cjavei grîs sui timplis e i bregons larcs e scûrs dai vecjos… o fevelarai cence la vergogne dai sotans, che Ti è tant a cûr. Sêstu content? In te o confidi il gno dolôr; e o stoi achì a spietâ la tô rispueste, come un miserabil e bon gjat ch’al spiete i vanzums, di sot de taule: Ti cjali, Ti cjali fis, come un frut impipinât cence dignitât. La buine reputazion, ah, ah!

Pari nestri che tu sês intai cîi, ce aio di fâ de buine reputazion, e dal destin - che semeavin dutun cul me cuarp e il gno trat - di no fâ par nissune reson al mont fevelâ di me?  Ce aio di fâ di cheste persone cussì benon difindude cuintri l’inciert? Pier Paoli Pasolini "

Il zugut des fiestis
Nol è Nadâl cence il zugut di auguris, e cussì chel simpaticon di Dree al à inmaneât une cjadene par chei che scrivin par furlan... Joi ce biel!

Jo par solit lis buti tai refudons, lis cjadenis, o fasarai une ecezion. Ve chi lis mês rispuestis:

Adietîfs par descrivi il to blog furlan:
Scuintiât vivarôs, sogjetîf, malinconic.

Trops blogarìns âstu cognossût di persone?
Cualchidun, ma cence che lôr cognossin il Furlan.

Cuâl blogarin varessistu gust di cognossi di persone?
La malafemmena.

Cuâl isal il prin blog che tu leis la buinore?
Verementri Repubblica, e dopo  il Furlanist, Transit e Dreceorelis, Jaio e vie indenant.

Di cuâl blog tu fiestezaressistu la sieradure?
O fasarès fieste se Chris al sieràs cun Fuarce Italie. O fasarès fieste se sierassin i blog pro Ana.

Fâs talent scout: lancie un zovin blogarin-promesse.
O soi par promovi blogarins furlans fra i zovins, o fra chei che san il furlan ma che no olsin a scrivilu.

E cumò o passi l'Elettrocjadenefurlane a cui che al vûl cjapâle. Ancje cheste e je fate.

Cumò o sieri fintremai daspò Nadâl, o voi a Praga, faseit dute la fieste che o rivais, pe diete e par vergognâsi, spietait la Befane, maman...

A cui che i plâs durmî ma si dismôf simpri di bon umôr,
a cui al salude cuntune bussade,
a cui che al lavore masse e si divertiss di plui, a cui che al va in premure cu la machine ma nol sune ai semaforos,
a cui che al rive tart e nol cîr scusis,
a cui che al distude la television par fâ une fevelade,
a cui che al è content il dopli cuant che al fâs a miezis, a cui che al jeve a buinore par judâun amì,
a cui che al à il vivôr di un frut e pinsîrs di om, a cui che al viôt neri nome cuant che al è scûr,
a cui che nol spiete Nadâl par jessi miôr di ce che al jere...

Viodût spetacul di lusso: "A fuarce di jessi svint". Al Menotti di S. Svualt un côr, chel di Cjasteons zontât cun chel di Gonars,  cuintet di arcs "Pezzè", fisarmoniche Zorza, e percussions intonadis une vore bielis di Gabriele Rampogna. Musiche di De Andrè rangjade dal mestri Sivilotti e cjantade de mitiche Mauro, la Cristina dai FLK.
In plui vôs di De Maglio e doi soi arlêfs de Nico Pepe: la brave Chiara Donada e Giuliano Bonanni il legnôs .

La spiegazion dai atôrs e je curte e cjape i sintiments e subite larc ae musiche. Li la vôs de Cristina e salte fûr in dut il sô sflandôr. Il côr al reste un pôc platât e i cincuante di lôr a son strassâts par cjantâ tant pôc.
Lis cjantis di Faber a son voltadis di Ennio Çate, Zampa, ma no la ultime de serade che Cristina le cjante a voi sierâts. Khorakhanè, voltade di Stiefin Montel, le à pui che digjeride, oramai la cjante come che e fos sô.
Pe prime volte o ai scoltât ancje il assolo che tal disc di De Andrè lu fâs la sô femine Dori e in conciert le faseve sô fie Luvi. La vôs scure e cjalde di Cristine si rimpine e lant di cjâf rive fin lassù. Ca e là il mestri Sivilot al met tocs musicâi ispirâts a lis melodiis des cjantis. Un conciert là che si è podût scoltâ gjenovês e furlan, lenghis che si tachin e che a cjantalis insieme, ben e sunin.

O soi jentrât pe prime volte intune caserme di cuant che o  soi bon di puartâmi ator di bessol. Mei amìs fasevin un spetacul di Nadâl. Jere int di ogni, fameis, feminis cui lustrins, la bande e daur un biel buffet tal "circolo unificato". Ven a stâi che prin al jere dividût . Tante etichete: salûts al siôr gjenerâl, al siôr di ca, al sindic di là, a la storie dal bataglion che al jere chel bataglion che al è stât in chê vuere in chel puest, e che al è stât impegnât in chel altri puest. Come che il bataglion al fos umanizât e al ves memorie.

Po dopo o ai cognossût i soldaduts, zovins, magruts, cjavei curts e fevelâ teron. Contents di jessi sot naie, ma ancje dal dut no savints di dulà che jerin come puest. Se fossin stâts a Cuneo o a Sulmona par lôr al jere distes.
Plui dûl a mi àn fat lis feminis soldât. Jerin cuatri, une dal nord e trê dal sud, bielinis, cui cjavei luncs tirâts tirâts strets daur, poc fascinosis, crudis, cuntune ande da film western. Pur di sorevivi a àn di dâsi chel tono di mascjats.
Tal buffet tant che i siôrs uficiâi si salamelecavin un cun chel altri, e i soldaduts a no olsavin a cjapâsu il gustâ, chei de bande e chei dal teatri a àn lecât fur gran.

Vuê tal supermarket de coop, a Udin in vie Pradaman. Bancs vueits, chel dai prodots di lat nome cul afetât in confezion.
Banc des pomis e de verdure vueit, mancul une cassele cun dentri carotis.
Une siore denant di me cjale ator, cuntun fâ di misteri, si rint cont che nol è nuie altri, pense par ben e svelte e jemple un sachet cun dutis lis carotis: trê chilos.

Int che fâs il plen di benzine cence vê'nt di bisugne. Feminis di famee che dan di volte e che cjolin trê chilos di carotis. Potence dal siopar dai camions. E se sclope une robe serie, ce fasino? Si copino par un toc di pan?

Pensavi, me pari nol è mai lât a cjacarâ cui mei professôrs. Jo lu fâs di simpri. Vuê mi è tocjât lâ a sintilis par mê fie piçule. Nol è che no si lis meretave, al è che mi secje sintilis. Soi un pôc stuf di savê che no studie avonde, che bisugnarès che stes plui atente, che podarès fâ miôr e vie indenant.

Fat sta che i insegnants ju sint frustrâts. Varan ancje reson. A àn un stipendi che nol è cuissà ce trop, son, la plui part, feminis, cussì i oms a puartin a cjase il pagnut e lôr no si danin cuntun mistîr. A part chei chi che a son lûcs comuns, (sarà invidie?), a àn un lavôr biel, cui fruts, che al varès di jessi biel, e cu la libertât di insegnâ che e je grande.

Vuê o 'ndi ai cognossudis trê. Une mi à cjacarât plui dai soi fîs che no dai mei. Un'altre mi è sameade esauride ma apassionade. La tierce, la plui grintose, mi à ditis un grum e une sporte. Dutis dacuardi che la me sbilfe e je simpatiche. Lu sai, lu sai, mi fâs ridi ancje a mi. Se no studie avonde ce si aial di fâ?