Brâf Furlan

“I dialets  muerin parcè che ur mancje une struture urbane e parcè i dialets no vegnin doprâts de popolazion di citât. I dialets a muerin cul ultin contadin.".

"E il câs dal furlan? Di une bande fevelâ une varietât furlane al vûl dî "jessi furlan" tant che tal câs dai svuizars, di chê altre bande però al vûl dî "jessi contadin..." tant che tal câs sloven.
Par dîle cun altris peraulis: il furlan al jere lât fûr mode par mancjance di contadins.
Par salvâ e infuartî une/la lenghe si scuen promovi o fâ sù un gnûf "status". Nuie di gnûf. La rispueste juste: scuele e TV par furlan (p.e. simpson par furlan) nuie di gnûf, no mo?”

O cjapi cheste sburte a pensâ al furlan che e ven di Janez (http://janezerat.blogspot.com/)

Lui al dîs che il dialet sloven al va al mancul parcè che nol è rivât in citât. La nestre Udin no à mai volût tant ben al furlan parcè che i parons fevelavin altri. Cumò che i parons samein jessi a Rome, o plui in là in Europe o a New York, ancje se nol semee trop, il furlan al è,  in maniere folk, plui di mode. Pai suissars centre la identitât dialetâl par mostrâsi todescs difarents.

Chest mostrâsi talians cuntune identitât fuarte nô lu sintin mancul. Di fat o scugnin sintîsi tant talians che furlans.

Jo no le ai tant cu lis variants. Secont Janez, se no fali, vê une varietât vive al rinfuarce la lenghe e la identitât. Se i contadins a son un scjap in vie di estinzion e a jerin lôr, cul lôr mont, la lidrîs de lenghe, o vin di cjatâ une altre fonde che à di jessi, par fuarce, inte int zovine. E cjalâ indenant parcè ai furlans zovins, dai lôr nonos, e dal mont di chê volte, a interesse simpri mancul

Cu la fin dai agns setante il mont al sameave jessi daûr a colâ. La montane de lote si jere sfantade e l'aviliment si incresseve dì par dì. O si jere chei dal sburtâ o si tiravisi in bande. Jo masse zovin par sburtâlu ju, in spiete di un mont gnûf che no si viodeve inviâsi, o ziravi ator in taront e o fasevi su par ju il stes zîr. Simpri lis stessis stradis, lis stessis musis.

Lis comessis di dentri dal lôr nît a cjalavin chel zovin cui cjavei riçots e i voi spirtâts come che o fos un animâl. Lôr ben sestadis a cjalavin di fûr come che o fos jo in mostre. Rispiet a lôr o mi sintivi incussient e inocent e lôr lis viodevi a fruiâ la lôr vite. Jo o jeri libar, ma libar di fâ nuie. Par cui che al voleve balâ la vite chê e jere la sô ore, si varès vût di butâsi sul breâr e tacâ a ridi dal mont.

La suele dal mê unic pâr di scarpis si fruiave. Mi sfuarçavi di no poiâ dut il pît a tiere par no strussiâlis e o rivavi fin a saltuçâ.  No vevi nissune premure di jentrâ te produzion ni di fâ cariere. No vevi chê di sierâmi intune scjaipule. Intant il me sierai al jere la citât, lis sôs stradis mi intortolavin dolcis e intai lôr braçs o mi pierdevi bandonantmi tal gno labirint. Cence il fîl par tornâ a cjapâmi.

Cui aial vinçût il 28 esim premi leterari Sant Simon? Un romanç dal titul "Il cop" un noir furlan. Cui lu à scrit? Laurino Zuan Nardin di San Vît dal Tor, li che al è nassût tal 1951.

O jeri un dai 13 che àn puartât un romanç. Il gno nol è plasût.
Tolazzi, de gjurie al veve la barbe piturade di blu. Lui e Cappello a jerin i plui triscj.
La gjurie e à dit che chei altris, ancje il gno, a cjacaravin masse dal Friul di une volte. Jo che o soi pal Fril dal dì di vuê. Boh! No ai rivât a fâmi capî. O forse il gno scrit al faseve propite sen di cagâ.A àn dite che no bisugne cjalà indaûr ma scrivi di ce che al capite: imigrâts, ambient, sdavassarie, omosessualitât e v.i.

Te fieste, 10 grâts, dute la int cun gjubots e gjachetis a svintul, e ploveve. Lis miss cuesse di fûr a jerin in costum e dute la int intabarossade e tirave i voi a viodi dut chel cicin fresc!

"La lenghe furlane eà une poetiche platade te sô ombrene, e je za musiche.” Gianni Mura

"Cuant che o cjacari in furlan, midiant cheste lenghe, o rivi plui dongje a la realtât. O ai un gno mût di viodi il mont che nol è facil meti a pâr a altris manieris. Il discors al è sui contignûts che si puedin burì fûr, par esempli intune cjante. In cualsisei lenghe la cjançon e à un vocabolari curt. Une cjançon no à di vê par fuarce un grant numar di peraulis. Dal sigûr che “Cjarozule” e je une di chês peraulis che no si puedin meti dentri une cjante” (Lino Straulino)

Resonant su chest discors cjatât in rêt, o mi domandi: “ Forsite une poesie a 'ndi à di vê plui peraulis?” No vint la sgjapule de musiche e po vê un ritmi diferent, sô, interni a lis peraulis. Jo Cjarozule lu doprarès se mi covente cjacarâ di Cjarozule. La cuestion e je une altre.

 Ise vere che il furlan al rive plui dongje a la realtât?

Seont me il furlan al rive là che dutis li slenghis a puedin rivâ. La diference e je che e je une lenghe tal puest just al moment just. Se un al vûl sintî chel discors in chel moment e in chel puest in furlan, alore i si scjalde il cûr. Al capis miôr il messaç e forsit ancje al rive plui dongje a la realtât.

“O vuei esprimi il mont di vuê cul furlan: fevelâ di television, di machinis, dal mont dal forest, di dut ce che si viôt e che si sint”. Lino Straulino

Cjar Gigi,
o soi un to fan de prime ore, o ai ducj i toi lavôrs, ti ai viodût a Grions cun "i Turcs in Friûl e a Zerà cul "Vanzeli seont Marc" e in tantis altris bandis.

Il to ultin disc lu stai scoltant e al ven fûr planc planc. Nol è facil, al cjape dolç e o crôt che al duri tal timp.

La tô musiche e je plene di malincunie ma o i cjati ancje pâs.Ciert no simpri si vûl scoltâ robe cussì cuiete, ma cuant che lu si fâs incjante.

Jo o soi ancje un apassionât de furlanetât. No soi un purist, ma un che al vûl frontâ il friûl di vuê cui imprescj e lis peraulis di vuê.
 Il to furlan al è biel e al è vîf. E al merete jessi cognossût parcè che puarte la furlanetât indenant. Te grafie o ai viodût che ti mancje uniformitât. A son monadis ma la scriture e je il spieli ancje di ce che si vûl dî, a son robutis che se tu vuelis une volte ti contarai.
Cun dute la passion pal furlan e pe tô musiche.
Mandi, un biât Furlan

Cjar Furlan,
la sielta da grafie a è stade di tigni che chi cjacari. Tu as reson su ce che tu dis, che no si po' usâ in mut diviers ce ch'al scuin jessi compagn. Tigninsi in contat magari si cognosarin une volte e cjacarin.
Grasie, Gigi

Dusintevincjecinc agns di preson: no ju si sint plui nancje tai procès par mafie. La procure di Gjenue ju à reclamâts pai 25 no global che àn ricognossût jenfri i miârs che tes zornadis dal G8 jerin te bataie des stradis, manifestants cuintri lis fuarcis dal ordin. A àn tiradis butiliis par incendiâ, clapadadis vitrinis, assaltadis camionetis de Polizai. Bisugne clamâ lis robis cul lôr non: je stade sdrumarie, pestadice, fisc e svalisaments. Just. Daspò sîs agns e je ore che si clamin lis robis cul lôr non. Se àn dal vêr fat dams, a àn colpe, àn di paiâ.

Nol mancje trop che o varin la istance dai 29 poliziots che a son sot procès par vie di chê, che un di lôr, il sot comandant Alessandri Fournier al à clamât “la becjarie messicane”. Une iruzion vie pe gnot là che forin pestâts a sanc plui di 90 di lôr tant che durmivin intune scuele. Lis butiliis molotov che àn metût in mostre par dai la colpe di tante tumie e violence, cumò lu savìn, a jerin stadis puartadis propite dai poliziots.

Dal sigûr i magjistrâts a domandaran dusintevincjecinc agns ancje par lôr, comprendûts chei, no pôcs, che in chescj agns a son lâts indenant in cariere. Si po capîlu. La leç dal rest e je compagne par ducj, a lu san ancje i fruts. Al è vonde spietâ.

Jo o soi stât a saludâ chei che partivin, la sere de joibe 19 di lui dal 2001, in tren par Gjenue. Une mari, a pene saludade la fie mi à dite: - Cuissà se tornin intîrs.

Cuant che l'aiar ti sburte daur al è facil sintîsi fuarts. Te vite a son moments là che lis robis ti van ben e altris mancul. Ma il biel al è che no van daur ai toi sfuarçs. Cualchi volte tu ti dâs di fâ come un mat e nancje fâlu a pueste al va dut cuintri. Altris, ma pocjis, cence danâsi cuissà trop, lis robis ti van ben. Alore ce fâstu. Tu ti sintis fuart, tu ti gjoldis il moment. Tu stâs come un beo a sintî il svant di jessi bulo e  la patafade e je za rivade.
No dîs di vaî prin di cjapâle, ma ancje gjoldi il moment, carpe diem, no rivi plui di tant, savint che la vite ti sdrume ca di un moment, nol è facil.
Jo o ai simpri pensât che la detule latine "in medio stat virtus" no mi plaseve. O pensavi che tal mieç e stâ dut e il contrari, il mal di panze e il sfuarç di vignî fûr dal penç.
Cumò mi starès ben ancje une cove mulisite tal mieç, cence pontis, cence buridis. Come cuant in autostrade si sta su la corsie dai camions. Se tu âs une machine vecje, come me, lâ in chê di sorpas, nol covente. O stoi in chê di mieç. Comò larès ben ancje chê in bande.

A Feagne îr as 4 e mieze, e je stade la premiazion di un concors di composizions musicai su tescj in marilenghe.
Il concors al veve dôs sezions: chê pai frutins fin a siet agns e chê pai fruts plui granduts.
Davide Pitis al à vinçût la sezion dai plui piçui cun "Il pavon e la grue, la ciale e lis furmiis, test voltât dal grêc di Esop di Picchio Vsentin, cjantade tal auditorium de parochie dal côr "In dulci jubilo" di Feagne.
La sezion dai plui grancj e je stade vinçude di Giuliano Fabbro cu la cjante "La cjase dai animaluts, cun test de zovine Miriam Venturini, cjantade benonon da la corâl Piccolo Coro Artemia di Tor di Zuin.

Si è rivâts a viodi ancje la presentazion di un DVD di viodi dai Omenuts, inmaneât di Massimo Garlati Costa, suntun materiâl 'merecan di pipinots animâts, voltâts par furlan. Il public di fruts al compagnave cun esclamazions tant a dî che i plaseve. Al è chest il tierç DVD dai 13 proviodûts. E je la version furlane dal carton animât de Mattel-Fisher Price une vore famôs. I pipinots a samein un tic plasticôs come chei dal Lego. Se o vês fruts ju cjatais là de Filologjiche che ogni tant e fâs alc di bon.

«Dimissions? No lis ritiri plui. Parcè? Dut il centri diestre al à acuardis come il gno, al è normâl, nome che no lu disin!»
E je lade cussì: cheste volte al veve pôre di pierdi. Al à cirût jutori cjatant Tavoschi. Ma tal so cûr al saveve che ce che i steve prometint, pactum sceleris, no lu varès mai mantignût. Si à cjacarât di vôt di scambi: sarà vere?

Che la robe e sedi lade sui gjornai al è un incident. Che al ledi dimissionari o comissariât di Illy a la zornade de elezion pôc al impuarte. Che al mueri Sanson e ducj i filisteos!

Mi domandi, di citadin, se un om di grande moralitât al vedi podût sbrissâ su une scusse fraide di chel zenar: isal di perdonâ?

Tant lui si è sierât tal palaç e di là nol si môf. E al svintule menacis, la politiche e je cheste, ducj a lu fasin.

«A son robis normâls, di ogni dì, no di dimissions», al zonte. E parcè si isal demitût «Par bon gust». Parcè aial tornât a cjapâ su lis sôs dimissions? «Parcè che no ai nuie di pierdi! Nol è nuie di strani e se al fos o tornarès dret a la Universitât».  Lui al à intun scansel ducj i acuardis prometûts tal 2003 par puescj di assessôr, presidents, incjariis». La Grillo? «Par fuarce e je la uniche femine e si le cjapais cun jê».

Tai agns la Tor, flumere a est di Udin, e je stade il scovaçon di Udin. E à insiorât i variis Danelutto, Midolini, Luci, siôrs de scovacis. Tra Pradaman e Paulêt i scovaçons no si contin.

Dut parcè cuant che si à tacât a vê refudonssi à butât dulà che no si coltave e daspò la che si gjavave glerie si è jemplât di scovacis.
Il pinsîir di riciclâ di plui e di cjatâ puescj mancul dongje a lis aghis al fâs fadie a jentrâ tal cjâf dai furlans.

Cumò l' Udinês al èscjafoiât des scovacis. Tant merit al va a Strassolt e al so guvier provinciâl.
Une des solitis ditis e vûl vierzi une gnove discjarie a Beivars, tant par gambiâ, su la Tor. Tant par gambiâ e je une buse di jemplâ. Samee che dutis lis busis a si scugni fâlis deventâ scovaçodromos.

Udin e à pene dite di no. Paulêt ni. Remanzâs si. Di cualchi bande lis scovacis a àn di lâ. I amerecans la clamin NIMBY, ven a stâi, no tal gno curtîl. Ma in chel pene plui in là, chel dal gno vicin.