Brâf Furlan

Verementri interessant il coment a la polemiche di Capuozzo (miôr i Alpins dal Premi Terzani) fate di Marco Pacini diretôr dal progjet “vicino/lontano” e dal premi. O volti cualchi toc de sô rispueste dal forum dal MV.

 
«Vive i alpins e ancje lis sagris. E dutis chês manieris che a fasin vignî fûr il Friûl plui profont. Soredut cuant che traviersin chê linie che no si viôt, che cualchidun e pense inesistent, e devente culture».

E ancjemò:

«O soi cressût in chest Friûl e o cjacari la sô lenghe che po e je la mê lenghe mari, il furlan. E je la lenghe des sagris e no dome. E je la lenghe di un Friûl che di agns in ca o viôt tornâ a nasi intes sôs formis plui autentichis, poetichis, in grazie a lis tantis iniziativis culturâls di cualitât, cun dut che la retoriche furlaniste che e pant plui paradis che no culture».

In efiets di chê de furlanetât metude in mostre e un poc vueide al è sfodrât il Friûl!

"Parcè il jessi tacâts ae tradizions e a la culture dal puest al à di jessi bon nome pes propuestis de culture in Friûl? Ise une rason parcè che la economie furlane e varès di cjacarâ il lengaç dal mont, tant che la culture furlane e scugnarès invezit restâ tacade a la tradizion plui sclete in une no finide auto rapresentazion?".

Capuozzo al sosten che il premi Terzani si podarès fâ dapardut: "si fâs a Udin parcè che il premi Terzani al fâs part di une manifestazion culturâl che si clame "vicino/lontano: identitât e difarence al timp dai conflits". E se o cirin lis fondis dal Friûl, cheste tiere samee vê lis cjartis in regule par dâ acet discussions ator a chescj temis. A mancul che la storie dal "Friûl crosade di culturis" no sedi une fufigne.

Al è ancje pussibil che si trascuri une obiezion ancjemò plui fonde: che il Friûl no sedi il palc just par contâ e cirî di capî un mont che al cambie e spes nus disoriente ancje sot la sburte di identitâts e diferencis. A judicâ di cemût che i furlans a àn fin cumò rispuindût al progjet "vicino/lontano" … o disarès che la obiezion e piert di fuarce."

Capuozzo che al cognòs benissim i gjornâi, al saveve che al varès tirât su un grum di polvar. Cuant che si tire su polvar a si riscje di impolverâsi e di tabiâ alc di puçalent.
Dut al nas parcè che al à dite che il premi Terzani nol è leât al Friûl e che i Alpins lu son.

Il premi Terzani al è la plui grande novitât a Udin dai ultins agns.
Rivuart ai alpins: a son di Udin come che a son ancje piemontês, abruçês, di Cuneo e di Verone, di Trent e di Gjenue e di nissun di chescj puest. I alpins a son une malincunie che tapone il vecjo, la retoriche e il vueit, di ce che al reste di bon, gjavant il cjapiel cu la plume al sarès ancjemò plui bon. Tra l'altri ancje il model dai alpins al è stât impuartât, alpins furlans a 'ndi  è muarts dapardut ma cui ju comandave, cui deve ordins, dulà sono lâts: dulà che altris, no i furlans, lu decidevin. Miôr il premi Terzani che pant ideis e culture gnove e di pâs.
La nestre novitât di tignî su, pluitost dai Alpins, a son la memorie di Turoldo e di Pasolini, i Colonos, il circul il Menocchio, Onde Furlane e vie indenant.

Viodût un biel spetacul a gratis. Saç di studi de Academie teatrâl Nico Pepe, dai atôrs che àn di cjapâ il diplome, là de lôr sede in larc Ospedâl Vecjo.
Atôrs zovins e plens di salût e di energjie, un dodis di lôr di sigûr avignî.
Il spetacul al contave la storie di Don Giovanni viodût cui voi des feminis ribaltant il solit pont di viste, che al è chel dal svant di oms cui oms, de concuiste des feminis.
Feminis che san, cognossin il truc dai oms e i colin distès. Feminis che si ribelin e che lassin il Don Giovanni di turni a bocje sute, ma ancje lu cirin dismenteant ce che ur à fat patì. Cussì inte vite, concentrât in penç tai cuadris là che atôr a trops, in a solo, in cubie, mascjos bessôi e feminis a part. In sumis cirût e cjatât il cûr dal probleme: chel om profitadôr e disgraziât, biel e maladet, al è un gust vêlu, ma ce tant miôr pierdilu.
II materiâl doprât al è chel di Molière e di Tirso de Molina, ma tant al è gnûf e alc, o crôt, ancje de farine dai arlêfs.
Splendit un monolic di une brave e piçule atore, mieç par talian e mieç par inglês, a coionâ i oms e lis lôr prestazions. Se une pecje e je al è il lengaç: talian si, alc par inglês, alc in venit e nuie par furlan.
Il spetacul al zirarà la Europe e puartarà ator il bon non dal Friûl.
Al è za pardabon un biel spetacul che no si ferme a meti in mostre il miôr arlêf, che al è, ma al cjape di cjâf a pît.
 Un toc cjantât un pôc leât, coreografie dai moviments bielonone, puest sacrificât.

Viodût îr di sere, in place dal Domo a Udin, il prin conciert de gnove bande Arbe Garbe.
Disin che la amplificazion e jere une vore brute, no sai se pal puest o pal strion dal mixer.
Sunôr compat e Big Gion cun cualchi timidece di masse.
No ai capide la batude a Leo se e jere triste o ironiche.
Mi son plasûts. Il gnûf ghitarist al à passât l'esam. Int a balâ e a saltuçâ a plen si divertive un grum.
Ciert la presince di Leo e jere tal aiar e la sô strionarie e mancjave, chei altris a metin un pôc  di energjie par taponâ la buse ma un front man, un om che al jempli il palc denant la linie ancjemò nol è, ancje se il bon Stiefin smagrît e mancul dark, plui clâr, mi plâs.

O conti di vê cul timp di vuê
un compit cu lis resons di îr.
O vuei jessi mestri di benstâ
sclarî il mont di buinis peraulis.

Cuant che il rogan sbrocât al passe
lassant aiar net e ramaçs crevâts
jenfri il dubi e il sest
volê e destin fûr puest
a restin zornadis di torzeonâ
cuant che pierdût intal forest,
o vuei cjatâ la rosute dal voli celest.

Jê baluçant, incanteseme dordei e griis,
cun fros di jerbe e claps batecui di flum.
Jo, bessôl o sgarfi il scûr de gnot
cuntun tai di neri o cîr
il segret par scjaldâ il cûr.

Becâisi cheste storiute:

    Jo o savevi alc. Chê bionde de classe dongje, la Ocje di Poçui, e sbat ben i voi, met il pontel a lis tetis, tire fûr il boton de panze, sdarne il cul e vie: chei stupidei di mui i colin da pît come dordei tal gabatul.
No pues contai che il Gnogno di Felet, chel stronzul al è sensibil ai voglons de Ocje e che jê e stâ fasint di dut par fâlu colâ inte vuate.

Al è un tananai di chei che a un zovin brufolôs i plasin a sec.
-  Ti à doprade in ce sens?
Cuant che al veve bisugne, mi cirive, si siervive a drete e a la mancine, al rideve, al çavariave di amôr e mignagnulis a sorte e jo metint i dêts intai soi cjavei, lu cjalavi di sot in su, lu bussavi e o jeri contente. E sigure e zonte:
-  No sarà migo la Piçule?
La Piçule e sarès une morute di Tresesin, biele proporzionade, une Barbie cu lis tetis a ponte e simpri cui tacs di dîs, i lavrons e lis ongulis rossis. Se e cjacare de Piçule no à capît nuie.
-  No larà migo cun chê?
O cambii discors, no sai ce dî, o miôr, alc o savarès dî, robis stupidis che si disin in chei câs cussì, robis come no stâ a fâ une malatie, ciriti un di miôr, claut pare vie claut e vie indenant.
-   Vinars o voi a une manifestazions cuintri i Triestins in Friûl!
-    Ise vere? Ce biel! Ven ancje jo! Cui vegnial ancje? Si cucjal?
Si è straviade bessole, al vûl dî che le à cjapade ben. No i cognossevi la passion pe furlanetât. E dute serie:
-   Mi met dongje dal Moro di Pagnà e no lu moli.
-   Il moro di Pagnà, cui isal?
-   No stâ a tacâle. Stâ a la largje che no vuei bilitis su lis talpis.
 Jo o ai bielza i mei mateç. O ai smicjât Culate Penze che al ven cu la moto rosse fûr di scuele, se no mi calcole i tabii un pît e par scusâmi i mostri il sclap dal agâr cuntun reggi 'super sculture'.

Torni a scrivi a Marino, emigrant dal Canadà, che nol à aprezât ce che o scrivevi des racueltis dal MV, e o cîdi spiegami miôr.
La operazion dal MV e je furbe, sdavasse e puare.
Furbe parcè che par cui che nol sa samee ben fate. Sdavasse parcè che no à chês minimis atenzion a autôrs, provenience, storie, esecutôrs, datis. Puare parcè che la sielte e podeve insiorâsi cun cualchi esecuzionregjistrade plui ben e cun cors plui bulos.

Marino, o vuei ben al Friûl e a la so musiche.
O soi cjantôr in plui coros e o ai une tasse di spartîts e di discos e une certe culture musicâl no di conservatori. A son trente agns che o cjanti. O ai tacât al liceu cun Gjilbert Pressac che chi in Friûl e no dome al è une vore preseât. Se tu vuelis un consei scrivimi.
Se tu vuelis che o meti alc public o soi pront. Pe musiche tradizionâl la robe miôr e je une racuelte dal '66 de SFF cun cjants cjapâts su di testemoniis. Pes armonizzazions a 'ndi è une vore ma forsit chês di Seghizzi a son lis miôr. Pes gnovis composizions par coro o pensi che bisugne sielzi alc tra chês di Di Piazza cence altri. Pe gnove musiche furlane (eletriche) FLK, Arbe Garbe, Sedon Salvadie, Braul e vie indenant.

Jo no vuei jessi un om che al cjale stranît il mont di vuê come la vacje che e cjale passâ il tren. No vuei nancje usâmi a chê che mi samêe la ingiustizie dal mont di vuê, ven a stâi la premure tai afârs, tai afiets, te vite interie.

Mi visi di mê none, e jere buine di fermâsi e di cjalâ lis monts, mê mari e cjale ancjmò lontan e jo o soi za mancul bon di fâlu; mê fie no je buine dal dut: il sô orizont al è a un metri, pierdût tra il telefonin e la ponte des sô All Stars.

Jo o podarès stâ cuiet. La memorie lungje, i fastidiis di vuê e la pôre de muart a mi mantegnin vîf. La mê cussience e côr fin al secul passât, il  secul curt. Il secul di cumò lu cjali cence messedâmi masse cun lui, o morosi cun chest timp nome se son dentri afiets e sintiments  che mi son cjârs. Se no, lu lassi cori, no pues viodi e proviodi migo dut jo! Mi è vonde sintîmi vîf.

O ai savût ancje vuê di une cubie separade. I furlans, o miôr lis feminis furlanis, a àn tignût dûr fin ai '90, cuant che a àn tacât a rompi a àn slacât.
Cubiis che a molin o 'ndi cognòs a pacs. No nome cubiis zovinis, cumò a molin lis cubiis che àn cuindis o  vincj agns di matrimoni, 45 agns di etât e no nome parcè che a àn une altre storie. Lu fasin par vê une vite.
Si viôt che chei che àn 45 agns a son stufs, a cirin. I fastidiis seriis, chei dal sens de proprie vite ti lassin scjassât. Ce cirino? La strade plui curte, molâ.
Si viôt che la vite di 20 agns indaûr no à savût rinovâsi.
No soi un fan dal tignî dûr a ogni cost. Cualchi volte o volarès savê mancul robis.
 Cambiâ par cambiâ no mi scussie.

Cence di te, cun te
un pas indavûr, un pas indenant
slungjant la man
cu la fuarce dal ramaç tal penç dal cîl
cul viaç dai vôi tal mont
a planc a planc si cjatarìn 'ne gnot,
cjalant di nô ce ch'a nol reste,
intun trimul lusî di lune, di fûr, tal cûr
dentri la lûs.

Pierluigi Cappello

Di tancj mês i purcits a vegnin paiâts ai produtôrs mancul di ce che costin e dîs  Elsa Bigai, diretore de la Coldiretti di Udin. Tantis des nestris impresis, che scugnin fâ i conts cui coscj di produzion la situazion e je grivie. Di Zenâr a vuê a pain ai produtôrs il 20% di mancul.

I purcits no pain plui vonde. Cuant che tirin nol è che si met vie alc, tipo investiments a promovi un “purcit furlan pal presut furlan” o ce saio jo. O salam di ocje o purcit cu lis alis.

Facil a dî che i contadins a spietin dal stât e de Europe, a vain ma a proponin pôc.