Brâf Furlan

Al è dut compit des feminis, mi à insegnât mê none, fâ si che la famee si tegni drete e no moli a la prime buerisine. Se jo lu ai imparât di mê none,  jê lu à fat de sô. I oms no son vonde fuarts, lu si sa, fasin dut un davoi, a berlin, a partissin inrabiâts e tornin, si che tornin, cu la code tra lis gjambis. Mê none e jere une gjendarme: la sô sole presince bastave ai oms a metisi in rie e par lâ cence fâ câs a viodi la buteghe dai bregons cemût che e jere e par jessi sigûrs di vêle sierade par ben. Une altre robe mi à contât: bisugne savê a fâ la ocje. Se no si lu è, al vûl talent, aplicazion e esercizi.

Coment dal Vicepresident dal Consei Provinciâl Valeria Grillo pe istituzion de Associazion jenfri lis Provinciis dal Friûl  “Une ocasion impuartante pal avignî dal Friûl e pe nestre int ». Daspò la adesion a chest impuartant procès politic des Provinciis di Udin e Pordenon o restìn viers par une prossime union di Gurize che jo o auguri che e jentri in curt a fâ part di cheste colaborazion, soredut pal ben dai zovins, che a vuelin cressi intune Patrie che e vedi une fuarte identitât e che e continui a fevelâ une lenghe ricognossude nazionalmentri."

Ce benonon che e cjacare samee une poesie a memorie, cui le à scrite?

A la Grillo un furlan medi i disarès che la nestre int e domande dignitât e pe culture mancul folclôr e plui impegn a partì des scuelis.

 “Un moment di impuartance fondamentâl pal Friûl sei dal pont dai valôrs sei dal pont des carateristichis economichis e culturâls, necessari par vinci lis tindincis centralistichis, in maniere che la union des Provinciis furlanis e puedi trasformâsi intun model agjil di federalisim interni ae Regjon” cussì il President de Provincie di Udin, Strassolt.

Al sô amî di jê, il gjalut Strassolt , i dîs che cu lis scovacis no sin al pont di Napoli nome parcè che o vin plui sintiment e la int furlane e à un alt sens civic ma che la provincie sui refudons e fâs gomit.

Su la culture: mancul sburtis a pro dai amîs e mancul pocadis in bande a chei che a no son simpatics. Il valôr al è valôr e lis monadis a restin monadis!

 

Chest an la fieste dal persut a Sant Denêl dal 22 al 25 Zugn 2007 e varà par santule la sflandorose Valeria Marini "proprio per la sua capacità di incarnare" une bielece bondante che e sa subite, e di lontan, cence pôre di falâ di cuesse di persut.

Sarà buine di gjoldi dal aiar di Sant Denêl cence jemplâ il gargat a scjafoion di fetis di persut?

Di sigûr e je un bon piron, buine di gjoldi la vite.
Une biele fritule furlane a 'ndi ere no?

La  prime poesie di PPP e nas  «In une matine dal Istât dal 1941, o stevi sul puiûl di len de cjase di mê mari. Il soreli dolç e fuart dal Friûl al bateve su dut chê materie rustiche. [...] Cuant e sunà tal aiâr la peraule rosada. [...] proferide in chê matine di soreli, no jere altri che une ponte espresive de sô vivacitât orâl. Dal sigûr chê peraule, in ducj i secui che je stade doprade intal Friûl di ca da l’aghe, no jere stade mai scrite. Jere stade simpri e nome un sun. [...] E o ai scrit subite dai viers, in chê fevelade furlane doprade te diestre Taiament, che fin a chel moment e jere stade nome un messedot di suns. O scomenzai par prime robe cul meti ju in maniere grafiche la peraule ROSADA.

Chê prime poesie sperimentâl e je lade pierdude, e je restade la seconde scrite la zornade daûr: “sera imbarlumida, tal fossal / a cres l’aga”».

Vuê o soi stât intune biblioteche comunâl e e je la seconde (Sant Zuan dal Nadison e Remanzâs) che mi disin che:

• a) no comprin robe furlane ma che e rive in regâl;
  

• b) che tant nissun la cjol, nissun la lei.
  

Pussibil tante maluserie e sdavassarie sul furlan intes bibliotechis?

Purpûr a son segnai difarents, tes scuelis tecnichis e professionâls il furlan si dopre tra i zovins e ancje cun cualchi insegnant.

Al è ancje un furlan tant che un “slang”, dal grup, des emozions, une lenghe riserve di onomatopeis par dî la robe juste al moment just e in curt. Une lenghe che e jude i fantats, a tornâ a cjatâ un centri di dulà partî. O forsit dome a tornâ a cjatâsi. Mighe pôc.

Tai puescj di vore ancje cui impiegâts ma massime cu lis mansions plui ordenariis lu si dopre. Mi àn dite che doprâlu in forme alte, di int studiade, al samee fals.

Parcè che nissun al tache a dì che doprâ il talian de bande di int che si sint benissim che e je furlane al samee plui fals ancjemò!

Si cirin amants de profession di infermîr.
La buse e à fat scatâ  il pericul. no son vonde. A mancjin plui di mil inte regjon. La lôr organizazion e cîr gnûfs infermîrs. Cemût? Prometint studiis dûrs, lavôr tant e paie pocje. Cui isal chel coion che al vûl lâ?

Mi interesse rivâ a tirâ fûr  la furlanitât de retoriche folkloristiche, chê fate di alpins, cjochis e pai de cucagne.

Cjacarâ cussì in Friûl al samee di trai a la Crôs Rosse, ma nol è cussì.
Jo o rivi a pensâ che chel Fri☼0l che al sa di vecjo al fâs mâl al Friûl, al gjave fuarce, puest, risonance al Friûl dal dì di vuê.

E, lu confessi, al mancul a une manifestazion cuintri lis Frecis Tricolôrs, si ben, o jeri ancje jo.

Cunvigne a Colorêt  inmaneade di chei de Radio Onde Furlane  "Lenghis minoritaiis, medie e emigrazion" si è podude sintî  cu la direte de Radio.

Impressionant la potence dai gnûfs media. Vie internet si è podût viodi chei de Argjentine che a fasin une trasmission de citât dulà che si fevele un furlan miscliçât e svoladiç.
Vie internet al à cjacarât  il furlan di Praghe, Cadorini, disint la sô ma stant sintât là vie.

Par fuarce che a no jerin plui di cincuante, chei altris a jerin a cjase lôr, cui pîts sul divan a scoltâ la radio cu la bire in man.

A àn dite che cualchi dun al à ufiart di mangjâ, cuissà se je vere!

O leievi alc su la storie de leterature furlane de Kersevan.
E conte che Tito Maniacco al à definide  'ideologjie furlane' chê dal salt, onest, lavoradôr.
Int che no si ribele e che acete il podê dominant, ven a stâi i sotans. Considerât il spirt furlan.

Efiet otignût gjavant ducj i ribei, i eretics, i laris, cuintri bandîrs viodûts come alc di pustiç, di forest rispiet al 'spirt furlan'.

Se e je stade une rinassite de cussience no je rivade dapardut, la int a pense ancjemò a chê furlanetât di museu.
Nol è facil cressi, massime cuant che si stâ masse ben te cove sigure.

O ai pierdût il festival VicinoLontano parcè che o jeri a spas.
Ce mi soio pierdût?

O jeri doi dîs sul lâc di Garde. Plen di vecjos, fruts in gjite e todescs.
Int siore che cjale i puarets dal viôt e scjampe. Fruts che jessi a Sirmione o di une altre bande al è compagn. Il traghet dal Naviga Garda cjâr, vevi tante gole di lâ ma il timp al jere pôc.
O ai viodût Salò.

Cun tal cjâf il film di PPP.

Biel e plen di che pachee che e po vignî dal vivi dongje al lâc. Dut al puarte al gjoldi, al vivi e lassâ vivi.
Chei zovins che a àn crodût al la republiche di Salò, se a vessin podût viodi il puest, no saressin stâts cussì cjamâts di ideai.
Al plui al plui, une Republiche di Salò e po fâ vignî voie di zuiâ di cjartis di Invier e di metisi in bregonuts a cjapâ soreli di Istât.
Mi displâs par chei zovins, ma a une capitâl sul Garde a no vevin di crodi.