Brâf Furlan

In provincie di Udin a nassin mancul fruts che intes altris provinciis dal FVG.
Parcè? Parcè che si vuelin fruts, ma a chei che si àn si vûl masse ben. I gjenitôrs a si viodin intai lôr fîs e pensin che al sedi lôr compit dai cundizions di vite miôr di chês che lôr a àn vût. E alore comprai la cjase, spietâ il lavôr just, spietâ che a si la sintin di lâ fûr di cjase. La basse feconditât no je colpe che a no si vûl vê un frut, al è che no si vûl il secont e tant mancul il tierç.

La proiezion demografiche de regjon a dîs che intal 2020 a sarin poc plui di un milion e intal 2050 poc plui di 857.000. Se al va ben. Parcè che la prevision plui pessimistiche a puarte 700.000 di lôr.
In region intal 1981 che o jerin 1.234.000 intal 2000 o jerin 1.185.000. Se o cjalait lis residencis, il numar al cale a Udin e in montagne e a cressin i paîs de prime perifarie di Udin e de planure.
In provincie di Udin o sin 250.000 mascjuts e 270.000 femenutis par un totâl di 519.000 che al sarès il 44% dei dute la regjon.

E se a je une mari che viôt di sô fi fin a trente ains e fâs un dam ancje al doman dal friûl: mancjaran al cont al sô piuçul se no un frut , cuasi ciertementri il secont e il tierç. Une robe cussì in dute Europe sucêt in Italie e in Friûl in particolâr. Al è alc che a no va.

O ai savût di une indagjin contade dai miedis de ASL di Udin che il furlan mascjo di cuarante ains medi rispiet al mascjo talian di cuarante ains:
1. al bêf di plui (nol è di maraveâsi viodude la tradizion);
2. al fume di plui (chest al è strani, si tache a fumâ di mancul dapardut);
3. al à il colesteroli plui alt (sarà pal purcit);
4. al fâs mancul ativitât fisiche.

Nol sarà che a chei di cuarante i ven il mal dal agnel prin di cualchi an fa e che chei che cumò a 'ndi an cincuante a si tegnin plui di cont?

O i ai pensât e tornât a pensâ. Ce che a fasin a Rome no lu sai, alc a cjataran, ma se o vin di cirì la soluzion mancul piês si podarès tornâ a votâ. Disin, e cussì al torne a vinci Berluscon! Intant o si lu meretin. E po dopo nol è dite che lu tornin a sielzi.
O vin vûts cinc ains di Berluscon e a son stâts vonde garps e disgraciâts. In chei cinc ains la çampe e varès scugnût cjatâ alc di fuart, di gnûf, di just pai timps che corin. Invezit a si son sintâts su la sielte plui sflacjose: chel di dîs ains prin, cu la cort che e jere dîs ains fa cu lis stessis vecjiis ideis.
Nissune invenzion, alc di sflandorôs, ni di sostance, ni inte comunicazion. Si à vinçût cul sburt, cuntun aversari che al jere cuet e no par Prodi ma ancje se o vevin Prodi.
E cumò?
Tornassial lui o un altri o sorevivarìn distès, in chel timp si varà cûr di fâ su ce che no si è rivâts a fâ in chei ains indaûr. Intal 2012 o varai cinc ains di plui, no crôt di podemile gjoldi plui di tant, une Italie moderne, un Friûl inovât, un paîs che al funzioni. O varès volût prin par me, mi bastarès che i mei fîs a vessin alc di sest!

Cjapi tocs de letare mandade al MV dal Furlanist e altris:
"...su la polemiche che o vês impiât – daûr des peraulis di Beppe Grillo – li che o vês metût un cuintri chel altri inovazion e furlan. Jo no ai voie di metimi di une bande o di chê altre: di fat, inovazion e lenghe furlane a van indevant insiemit, e a convivin benon.
Vie pe setemane prime di «Innovaction» diviers media che a lavorin par furlan come Radio Onde Furlane o il blog Ilfurlanist a àn inmaneât une «setemane tecnologjiche» cun intervistis, articui e intervents di esperts sul argoment.
Dut par furlan e in maniere furlaniste, stant che lis gnovis tecnologjiis a judin tant lis piçulis lenghis. Noaltris che o stin daûr al dibatiment su la tecnologjie – in marilenghe, al è clâr – lu savìn.
Cun di plui, o visi che aromai di 4 mês, su la riviste storiche – di simpri in marilenghe – «La Patrie dal Friûl» a son dôs pagjinis interiis di «rubriche tecnologjiche» su 32 pagjinis in dut: in percentuâl cun dute probabilitât al è il gjornâl furlan che al dediche plui spazi a chest argoment.
Su chescj media si à fevelât di wiki, Vichikipedie, podcast, open source, blog, forum, dizionaris eletronics, citadinance eletroniche, probleme adsl sul teritori, web 2.0, browser par furlan e tant altri."
Grillo e MV  àn fate une falope, o disarai di plui, Grillo lu perdonin parcè che al è forest, ma il MV al merete alc, no vin une propueste par meti in discussion il fat che innovazion e furlanitât a van dacuardi?
Cuant che un siôr anzian mi à dite che cjacarâ di furlan inte nestre ete al è fûr timp, i ài rispuindût che ancje curâ i vecjos e spindi tant pe lôr salût poc timp fâ al jere ancjemò fûr timp! Soio masse trist?

Un zovin politic udinês, che al à za gambiât doi o trê partîts . Intune tratorie dongje la biblioteche di Udin, al ordene un plat di paste e intant che al spiete al cjol pan, vueli e al prepare une, dôs, trê "bruschetis", cun dut il pan che al rive a raspâ ancje dai taulins dongje. Il vueli al cole bondant e il zovin onorevul al à une muse gjoldìnte di mataran. Al dîs: "I amîs di Rome", o "O vin di scombati pal gambiâmint", e "Vonde cun chei che san nome profitâ!". Al bute cinc euros sul bancon e al va, al à premure, al à di screâ un negozi: a i àn prometût un vistît di regâl.  Ancje vuê -al dîs jessint- il probleme dal gustâ al è distrigât. Un che vuê al è in fieste e che nol à mai lavort. Cui puedial sedi?

Sandri il contadin: al vîf di vedran za cu la pension, ma al è zovin cui soi cincuante ains, e chê di invaliditât dai soi e la compagnadorie, ma che no 'ndi àn di bisugne parcè che a lavorin dut il dì.
Al tire bêçs par no lavorâ i cjamps, si è metût a puest la cjase brute, rufiane e volgâr ma che à di jessigi costade. Al zire pai locâi a cjace di feminis cul sô SUV neri lustri e a nol fâs nissune fadie a cjatâlis.
Al bêf un tai daur chel altri, smicjant il cul da lis feminis, e al dîs ridint: -O soi romantic, o cîr la femine juste.

Se tu âs voie di cjoli une television sparagnant tu âs di fâ cussì. Fâs cincuante chilometrots, cjate di lassâ la machine in tante mone, cjamine par sîs cent metrots, jentre tal grant  magazin   e butiti intal mismàs; spiete par rivâ a cjatâ un comès, cuant che tu lu âs nome par te, in mieç minût ti disarà svelt une spiegazion che tu no tu rivarâs a capì.
            Tu scugnarâs sielzi bessôl tra il super digjitâl al plasma cun decoder e riceviment satelitâr di doi mil euros e il Mivar vincjevot poleârs di tresinte e otante. Tu puartis vie nome un bilietut cuntun numar, al è chel di doi mil euros.
            Cumò une altre file par paiâ. Nuie televisôr, bisugne lâ di fûr, fâ un zîr dal capanon, jentrâ intal magazen e spietâ une altre file. Ti puartin un carton e tal lassin a li. Tu âs di cjapâlu bessôl, vierzilu, capì alc, sudâ, tacâ la spine e provâlu, se no tu jessis fûr cuntun difiet e nol va ben. No pierdi la pazience, cumò tu âs di rivâ là de machine lassade sîs cent metrots plui in là.
            Tu lassis il televisôr e tu vâs a cirî la machine sperant che un altri a no si lu puarti vie. Tu rivis dongje e come te altris vincj di lôr e an pensât di fâ compagn di te, si intrighisi l'un l'altri. Tu puartis fûr il televisôr tu lu cjariis, nol stâ, sbasse ducj lis sentis de familiâr ma ti tocje là vie cul portelon viert parcè che il cjanton daûr in alt a nol lasse sierâ.
            Tu âs un carel cun dentri dôi euros, tu sês cuntun gnervôs che tu molaressis carel e euros dentri, …ma tu sês furlan e tu vâs a metilu a puest.
          Se tu lu cjolevis a Udin tu cjolevis chel che ti coventave, tu stevis mieze ore e tal tacavin tal tinel.

O ai sintût a dì che su 10 centenaris furlans nome doi a son oms. Us risultial?
Jo o ai une mê ipotesi un poc misogjine: i oms a sopuartin dute la vite lis feminis e a  la fin socombin parcè che lôr a son plui tristis, sore dut di vecjis.
A mi mi plasin tant lis feminis, ma lis vecjis lis cognòs nome come nonis.

An dite che in Friûl no sarà nêf che parsore dai 3.000 metrots, alore no sarà; Grado e Lignan a varan ce fâ a tignì di cont il lôr savalon e dut câs a laran sot aghe. Contadins che varan di meti bagjigji, dismente la blave, e pescjadôrs a cjapâ su pes tropicâl. Al è chel che a nus spiete daûr ce che an dite di chi a poc! 
Crodi, no crodi? Se no fasin nuie si gjavin ancje l'alibi di vê provât! Jo par intant o mangji cence cjâr, o voi plui a pît o in tren e mi scjaldi a lens e voaltris?

O mi sint ben ai funerâls di paîs, mi dan emozions, mi fasin vaî, o resti commovût di lunc.  Se o puess no mi  inpiert un!
O voi cirint il dolôr intes musis dai parincj e no lu cjati. Se i tonin la machine a son plui displasûts.
Mi plasin chei funerai, forsit in Cjargne, dulà che il daspò al è plen tant che la funzion. Dulà che si bêv vin neri, pan e salam e formadi, e bussui di sgnape.