Brâf Furlan

Samee che si rivi a resonâ. Pe prime volte o ai let che i comerciants di Udin i stan a sierâ ancjemò di plui il centri, e vie Marcjât Vieri in particolâr. E mico un mone cualsisei: Croatto, zoielîr, il titolâr de buteghe Zanolin, Puppin, a disin che par lôr mancul machinis in Udin al è plui biel. A jere ore!
Subite a dan la tacade però: in cambi o volin investiments, o ves di fâle deventâ un bebei, plui biele e plui cjare! In altris peraulis, che la int a ledi al citât Fiera, che i siôrs a vegnin intal tinel dai siôrs!

"Che de peteadis incuinantis biel plui de combustions dal vueli, al è une cuistion dibatude: in ducj i cas, però, al à di jessi ben clâr che il carboni atmosferic (CO e CO2) nol è incuinant di bessôl, ma je la cuantitât presinte ta l'aiar che e je deventade masse. A je la combustion dal vueli che 'ndi à liberade di avonde che prime e are sot tiere.
Ancje se la cuantitât sbitiade da lis vacjis e je plui alte di chê des machinis, chel des vacjis al è "l'istès" carboni che al zire in circul te cjadene de mangjative atmosferiche (che e jentre inte vacje cul mangjâ blavis, e inte blave cu la fotosintesi) di etis e etis, invezit che des machinis al è carboni atmosferic "gnûf", che nus gjavin fûr de tiere d'un continui! Al è chest ultin che al à vuastât lis ecuilibris!"  (LC-Graziononis, ben scrit!)

Vedût  (Auditorium Menossi di Sant Svualt ) "Balade par un sium" di Gianni Gregoricchio.
Test nût e crût. La storie e conte dai ains vincj cuant che i contadins a vevin voie di saltâ fûr de metadie e lis scuadratis fassistis a an fermât sul nassi lis lôr rivendicazions. Dut dal di dentri de famee dal contadin sindacalist che à pôre che il dut i vegni a sô dam.
Biel test, regje inesistente, musichis cjantadis a vôs discuviertis di un côr di feminis, nuie azion seniche. Di tornâ a viodi cuntun alestiment plui di sest. Auguris al autôr che pâr che a nol stedi tant in salût.

Viiodût al Zanon. Là che son Caia Grimaz e la Nicoletta Oscur a fasin simpri une biele figure.
Somaglino al à dôs musis: chê mumiote e chê cui vôi scocolâts. Ma la vôs a je un spetacul. Baste che a nol cjanti. E lì al cjantave di spess.
Al è un spetacul su la memorie. Cjantis e ritais di gjornâl. Mancje une storie un fîl, un fat un colp di sene. A tre cuarts a si duâr...  se la sente a je comude.

 

O soi stât a Cjargnà a la comemorazion par Nikolajewka , in Russie, là che i alpins furlans a an cjapât une biele batoste. No stait a pensâ mâl! O jeri par un servizi, e lavôr al è lavôr!
No ai scoltât nancje une peraule di ce che i furlans a jerin lâts a fâ là! Lôr a disin di tignì cont da la memorie, dal dolôr de pierdite, dacuardi, il dovê, mancul dacuardi. Ma ce fasevino i nestris soldâts in Russie? Se us mandassino a invadi la Russie, laressiso? Jo no.

VVinars 26 zenâr a lis 17.30 il premi Nonino al è vignût al Visionari. Il film al jere MOOLADE', che al vûl dì 'diritto d'asilo'. Il premiat Ousmane Sembène al jere malât ma a jere la so icone la biele e brave Fatouma Coulibaly. Che e à dite: "A cui no plasino lis feminis? Cui da la vite? Parcè che i oms a no disin nuie cuintri lis mutilazions da lis feminis? Lis feminis dal Mali a son coragjosis, e ancje a Udin a 'ndi è!"

Soi stât a sinti le cunvigne di îr inmaneâde di "Sinistre ecologiste" e "Colombe". Tacave a lis 5.30 a lis 6.40 no vevin ancjemò tacât a cjacarâ dal argoment che al jere l'ambient inte leç finanziarie dal Stât talian. Fufignis tantis. An butât un fruçon di pôre ambientaliste e pocis soluzions. La prossime volte o voi al cine!

Lait ducj a stâ a Remanzâs? An puartât la tasse comunâl da l'IRPEF al 0.6%! E je la plui alte in province di Udin. Ce che al vûl dì? Che un dipendent al passe, se al è a stâ la, di 5 euros al mês a 15.
O se ûs interesse in un an da 60 a 180 euros.
E si disin une aministrazion de bande de int. Se o sês in timp scjampait di Remanzâs!

Vê ce che al à vût scrit P.P. Pasolini de nestris vilotis:
“Une brevitât metriche, che dal rest si fâs profonde inte intimitât dal contignût e largje inte melodie: mostre cemût che al cjante un spirt vuarp e malinconic, come puedin jessilu ciertis pierdudis culinutis alpinis, sot sere, d’invier; e da lis voltis plen di une ligrie ingropade, ruspi e bacanot, un spirt che al jemple plaçutis e orts intai gjespui odorôs, intes gnots clipis”.

Jo no sai ce che al sarà dal Friûl che al à di vignì.

Jo o sai nome che il Friûl a nol podarà scjampâ dal confrontâsi cui problemis che a valin pal Friûl come a valin par dutis lis regjons dongje da lis nestris.

Friûl malinconic e a schene basse? Vonde sotans, sorestants stait atens.
Furlans coions sveâisi!